Clinical trial nga gihimo dinhi legal

CEBU, Philippines — Gikwestyong clinical trials sa usa ka Covid-19 vaccine brand nga gihimo dinhi sa Cebu City, legal ug gipahibalo ang Cebu City bahin niini apan adto gi-address kang Mayor Edgardo Labella kinsa hangtud karon on leave pa gihapon.

Mao kini ang pamahayag ni Visayas Vaccination Operations Center and Department of Health-VII’s chief pathologist, Dr. Mary Jean Loreche kinsa mikompirmar nga gihimo kini karong clinical trial sa usa ka pribadon tambalanan human nila kini giimbestigar.

Ang imbestigasyon ilang gihimo human dunay nanggawas nga balita sa media kabahin niini, apan sa unang pagpangutana miangkon siya nga wala sila masayod o bisan si vaccine czar Melquiades Feliciano.

Bisan si acting Cebu City mayor Michael Rama ug mga konsehal sa siyudad lakip na si City Health Officer-in-Charge Dr. Jeffrey Ibones wa sab masayod kabahin niini ug nakurat pa gani sa dihang gipangutan-an og impormasyon sa mga tawong na-recruit para sa maong clinical trial. Apan nahibaw-an ning bag-o, nga ang Department of Health pinaagi ni Undersecretary.Myrna Cabotaje nipadala diay kini og suwat ngadto ni Mayor Labella niadtong Agosto 25, 2021.

Apan ang suwat ni Cabotaje gitumbok niini ang Cebu City nga usa sa mga giilang “study sites” sa Department of Science and Technology lakip niini ang pag-evaluate sa safety ug immunogenicity sa pagsagol sa nagkalain-laing brand sa mga bakuna batok Covid-19.

Ang suwat wala gyud hinuon motumbok kun naglakip ba niini ang independent trials sa Westpac, dunay mga detalye nga gibutang ni Cabotaje sa suwat para sa mayor kung duna kini mga pangutana, apan wala man hangtud karon ang mayor. “Totoo po yan and that is a valid clinical trials...Ito pong vaccine clinical trial ay approved by FDA, no.2 Single-joint research ethics board of the DOH and of course, this is spearheaded also by the PCHRD, the Philippine Council For Health, Research and Development That is a very legal clinical trial that is being conducted in Cebu City,” si Loreche miingon.

Ang Wesvac independent trial, dunay pagtugot sa Food and Drug Administration uban sa Single-joint Research Ethics Board of the Department of Health nga gipangunahan sa Philippine Council For Health, Research and Development.

Sa website sa PCHRD, ang WesVac phase 3 trials anha gihimo sa Perpetual Succour Hospital. Gani duna pay mga hulagway nga gi-post sa online sa mga partisipante sa trials.

Gawas sa siyudad,  ang trial gihimo sab sa Makati Medical Center,  Medical City sa Iloilo, Quirino Memorial Medical Center, De La Salle Medical and Health Sciences Instituter, Tropical Disease Foundation, Inc., West Visasyas State University Medical Center ug St Luke Medical Center - Global City. “This is also just performed in one private hospital because that is currently the only hospital(for Cebu City) that is currently accredited with a level 3 accreditation to conduct clinical trials,” dugang pang Loreche nga wala panganli ang tambalanan.

Matud ni Loreche nagsugod kini niadto pang Septiyembre, wala hinuon mahibaw-i kun duna pay laing kompanya gawas sa WestVAc ang naghimo niini dinhi.

Ang ubang kompanyang naghimo niini niini mao ang Sinovac, Janssen Pharmaceuticals, Clover Biopharmaceuticals, Inovio Pharmaceuticals, Shenzhen Kangtai Biological Projects, ug Livzon Mabpharm.

Sa eksplinasyon ni Loreche, kini miingon nga gikinahanglan kining mga clinical trials ug mas maayong mosalmot ang mga Sugboanon sa mga ingon niini.. “Kasi alam po natin, alam nyo po kailangan talaga tayong maging active at sumama sa mga ganito because it is only through this clinical trials that we will truly be able see the effectiveness of wether one particular brand that we have is better or not and secondly, of course, marami pa tayong kailangang alamin sa mga bakuna na meron tayo kagaya nitong paghahalo, pagmimix ng different platforms,” dugang pa ni Loreche.

Apan si Konsehal Dave Tumulak miklaro nga wala siyay pagsupak bahin niini apan nanghinaut kini nga gipahibalo sila sa mga ahensiya sa gobiyerno nga nagtugot niini aron wala untay kalibog nga nahitabo.

Giklaro sab niya nga ang mga vaccination cards unya sa mga tawong niapil sa clinical trial dili dawaton sa mga establisamento lakip na sa mga pagbiyahe-biyahe ilabi na karong gipatuman ang vaccine bubble sa siyudad tungod kay di man rehistrado sa sistema sa siyudad ang ilang mga vaccine cards. —/IBM (BANAT NEWS)