Voter registration lugwaya’g usa ka buwan
CEBU, Philippines — Tungod sa mga panawagan ilabi na gikan sa Kongreso, ang Commission on Elections misugot nga lugwayan pa og usa ka buwan ang voter registration hangtud na sa Oktubre 31 inay nga karong kataposan sa buwan sa Septiyembre.
Si Rep. Francisco Matugas (Surigao del Norte) kinsa namahayag para sa Comelec, mikompirmar niini atol sa deliberasyon sa Ubos Balay Balauranan sa giduso nga 2022 budget sa Comelec.
Daan ng gisuportahan sa House ug sa Senado ang mga balaudnon nga palugwayan pa ang voter registration/ Samtang si Comelec spokesperson James Jimenez sa sayo pa miingon ng daan nga posible gyung lugwayan sa en banc ang pagpangrehistro.
“After consultation with Comelec officials, and in consideration of the public clamor, it is likely that an extension of the period of voter registration will be granted,”si Jimenez sumala pa sa report sa Philstar.com.
Una niini, ang Comelec mouyon lang unta kun usa ka semana lang ang lugway human makaduso og sertipiko de kandidatura ang mga kandidato gikan sa Oktobre 1 hangtud sa 8.
Ang mga kadagkoan sa Comelec midugang sab nga mipasidaan nga kun lugwayan ang voter registration lapas sa ilang gitugot, posibleng maapektahan ang ilang preparasyon sa 2022 elections.
Apan wala dawata sa mga magbabalaod ang ilang mga rason kay mas gusto nilang lugywan kini og usa ka buwan.
Nabantayan nga nagdasok na karon ang mga registration sites sa Comelec tungod sa nagkaduol nga deadline, apan pinaagi niining usa ka buwang lugway dili na kini mahitabo.
Sa laing bahin, ang Comelec sa Cebu City kauban ang Cebu City Police Office mopahigayon og simulation exercise karong Oktubre 30 sa posibleng mahitabo atol sa filing of candidacy.
Gustong makita daan sa mga opisyales ang senaryo aron pangandaman kini tungod kay naa pa gihapoy hulga sa pandemiya, estampede, hulga sa seguridad ug uban pa.— IBM (BANATNEWS)
- Latest
