Tanan, apil bata pabakunahan
CEBU, Philippines — Si Presidente Rodrigo Duterte mihatag na og pagtugot nga bakunahan ang “general population” batok sa COVID-19 sugod karong Oktubre 1, matud pa sa pahibalo sa Malacañang kagahapong adlawa.
Una ng gimando sa DILG sa tanang LGUs sa nasud nga sugdan na ang pagpangrehistro sa mga kabataan aron makapabakuna.
Ang Pilipinas naa karon tungatunga sa pinaspasay nga pagpamakuna sa mga nasakop sa priority groups sama sa mga healthcare workers, senior citizens, mga tawong masakiton ug frontline workers.
Apan wala pa maapil ang mga bata ug ang tanang hut-ong tungod kay giuna ang mga naa sa prayoridad.
Gipahibalo karon sa Malacañang nga si Duterte nitugot na sab nga mabakunahan ang mga bata dungan sa maong petsa.
Matud pa sa tigpamaba sa presidente nga si Harry Roque nisugot ang pangulo tungod kay daghan nang nangabot nga suplay sa bakuna dinhi sa nasud.
Giawhag karon ni Roque ang mga ginikanan nga ipalista na ang ilang mga anak sa pagpamakuna kontra Covid-19 sa nagkadaiya nilang LGUs.
Moabot na og 69.62 milyones doses nga lain-laing brand sa bakuna ang nangabot dinhi sa nasud sukad niadtong Marso 1, 2021.
Ang Pilipinas nagsalig lamang niining bakuna aron makabangon ang ekonomiya nga nikamang gumikan niining Covid-19 nga nilalas og kapin na sa 37 mil.
Napugos sab ang gobiyerno nga patas-an ngadto sa 90 porsiyento sa populasyon ang kinahanglang mabakunahan karong tuiga tungod sa Delta variant.
Una ng gitarget bakunahan ang 70 porsiyento sa populasyon. Apan sa pagkakaron, 18.62% palang sa populasyon gyud ang nabakunahan base sa talaan niadtong Septiyembre 26,2021.—IBM (BANATNEWS)
- Latest