Nigradwar sa TCC ug nasakop na karon sa PA nidasig sa mga batan-on
CEBU, Philippines — Nidasig sa mga batan-on nga dili usikan ang panahon sa pagtungha ang kanhi tinun-an sa Talisay City College (TCC) nga karon usa na ka sakop sa Philippine Army (PA).
Si Second Lieutenant Danica Rose De Leon, 26-anyos uban sa iyang mga kauban nga nibisita sa buhatan ni Mayor Gerald Anthony “Samsam” Gullas Jr. aron ipaabot ang iyang pasalamat sa iyang naabot karon.
Si De Leon nikuha sa kursong education nga nag-major og physical education sa TCC ug nagpuyo siya sa Barangay Lawaan 3 uban ang iyang upat ka igsuon.
Matud ni De Leon nga nag-agi usab siya og kalisod diin ang iyang inahan usa ka mananahi og trapo.
Nahatagan siya og kahigayonan nga makatungha sa TCC ug tungod sa iyang determinasyon nakalampos siya sa iyang pag-eskwela ug nasulod sa Philippine Army.
Sa pagkakaron, menos pa gyud ang nagpa-enroll sa TCC tungod kay mas gipili sa mga tinun-an nga manarbaho tungod kay giingong wala sila’y makat-onan sa modular nga paagi sa pagtungha.
Apan si Gullas nidasig gihapon kanila nga motungha tungod kay libre ang TCC ug usik ang tuig nga maputol ang ilang pagtungha.
Si Gullas nipadayag sa iyang kalipay sa pagbisita ni De Leon kaniya. BDB (BANATNEWS)
- Latest
