29 ka kapitan supak nga himuong free zone ang North District

CEBU, Philippines — Ang mga barangay kapitan sa north district sa Cebu City nipirma kini og manifesto nga naghangyo kang kanhi mayor Tomas Osmeña nga dili himuon nga free zone ang pagpili pagka-kongresista.

Nasayran nga 29 sa 46 ka barangay kapitan ang nipirma sa nahisgutang manifesto.

Giingong ang maong mga kapitan nagkanayon nga nagkauyon sila nga usa lang ang ilang suportahan pagka-kongresista sa north district nga mao si Rachel Marguerite “Cutie” Del Mar kinsa kaalyado sa Bando Osmeña Pundok Kauswagan (BOPK).

Nasayran nga gusto sa mga kapitan nga magpadayon ang “Serbisyong Del Mar” nga dugay na nilang natagamtaman.

Ang mga kapitan nipagawas sa ilang manifesto tungod kay dili sila pabor nga duha ang padaganon diin maghatag lang kini og higayon ug pabor sa kaatbang.

Kadaghan sa mga kapitan nga niduso sa ilang pirma giingong natagbaw sa serbisyo ni kanhi kongresista Raul Del Mar ug maoy ilang tinguha nga ipadayon kini ni Cutie nga nagtinguha usab sa pagpapili isip kongresista sa sunod tuig nga eleksiyon.

Ang pagpagawas og manifesto sa mga kapitan tungod sa mga hungihong nga giingong padaganon sa kanhi mayor si kanhi konsehal Mary Ann Delos Santos.

Sa pagkakaron nagpaabot pa ang mga kapitan sa desisyon ni Osmeña kong ipadayon niini nga free zone ang north district. BDB (BANATNEWS)