Panday miunay og kawat sa gitrabahong tindahan

CEBU, Philippines — Usa ka panday ang gipadakop human gipasanginlang niunay og pangawat sa iyang gitrabahoang tindahan sa barangay Tabunok, Dakbayan sa Talisay niadtong miaging adlaw.

Una niini, usa ka Joel Aldaya, 39, usa ka negusyanti nga taga lungsod sa Minglanilla ang nidakop sa iyang panday nga si Jeffrey Estrera, 30, taga Mananga 1, Barangay Tabunok sa nahisgutang siyudad.

Sa inisyal nga imbestigasyon sa kapulisan nag-imbentaryo ang biktima sa ilang mga baligya. Apan ilang namatikdan nga nawagtang na ang ilang mga baligya nga cellphone.

Sa pag-review nila sa CCTV footage nakit-an si Estrera nga maoy nikuha sa mga baligya nga adunay gibana-bana nga balor nga P12,000.

Gidakop dayon niya si Estrera ug ilang giturn-over sa kapulisan. Gikatakda kini nga pasakaan og kasong pagpangawat.— IBM (BANATNEWS)