Casas gireklamo ngadto sa Ombudsman

CEBU, Philippines — ^{Si Cebu City Administrator Floro Casas Jr. gipasakaan og kasong grave misconduct ngadto sa Office of the Ombudsman.}

Ang complainant kinsa nihangyo nga dili ibutyag ang iyang pangalan nikwestiyon sa gibuhat sa kagamhanan sa Siyudad sa Sugbo sa niaging tuig kalabot sa pag-abang niini og 373 ka vans ug jeepney  nga nagkantidad og P48,902,000.

Giingong gigamit ang maong mga sakyanan alang sa health workers ug mga residente sa siyudad dihang nitumaw ang pandemiya.

Matud sa maong reklamante nga dul-an sa 95 ka passenger jeepneys ang giabangan ug matag jeep P2,500 ang abang niini matag adlaw.

Ang maong pag-abang sa nahisgutang mga passenger jeep nilanat og siyam ka buwan ug giingong nikabat nagdto sa P11,062,500  ang nagasto sa siyudad.

“Thus, we ask again — if these amounts that Respondent CASAS spent did not take time to be released, why is it that the salaries of the 98 job order nurses of the Cebu City Quarantine Center (CCQC) were delayed?”, pangutana sa maong reklamante.

Matud sa reklamante nga labing angayang hatagan og pagtagad mao ang sweldo sa medical frontliners.

Sa iyang bahin, si Casas nagkanayon nga andam niya nga tubagon ang maong reklamo ug giklaro niini nga nisubay ang siyudad sa hustong  procurement process.

“Di man gyud mi mahadlok sa kanang among mga procurements. Sige nalang ko’g balik-balik, di gyud mi mahadlok kay kana siya nga procurement, mi-go through man gyud na siya sa atoang procurement process in accordance to procurement law”, matud ni Casas.

Gitataw usab ni Casas nga sa dili pa siya mopirma mag-agi ang mga dokumento sa Bids and Awards Committee nga maoy mo-review busa nakita niya nga nag-agi gyud kini og hustong proseso.

Matud ni Casas nga gipaubos kini sa emergency purchase apan giagi gihapon kini og canvass ug gipili ang pinakaubos nga presyo. —BDB (BANATNEWS)