Bag-ong building sa CCMC wala pay occupancy permit
CEBU, Philippines — Gikompirmar ni Cebu City Building Official Florante Catalan nga wala pa makakuha og occupancy permit ang bag-ong building sa Cebu City Medical Center (CCMC).
Apan giklaro ni Catalan nga giproseso na kini sa engineering department sa siyudad. Si City Administrator Floro Casas Jr. niklaro nga gibuksan ang bag-ong building sa CCMC sa unang tulo ka andana niini gumikan kay gikinahanglan kini alang sa COVID-19 response.
Matud ni Casas nga giproseso na ang permit niini ug dili angayan nga mabalaka ang publiko ug gipaniguro sa kagamhanan sa siyudad nga luwas ang maong building.
Nasayran nga regular ang paghimo og inspeksiyon sa Department of Engineering and Public Works (DEPW) sa maong proyekto.
Adunay onsite team usab nga nagkatutok sa pag-supervise sa construction sa maong tambalanan.
Nasayran nga sa niaging adlaw nag-post diha sa Facebook ang negosyante nga si Arturo Barrit ug nikuwestiyon sa pagpagamit sa CCMC bisan wala pa'y occupancy permit .
“Catalan boasted for faster processing of building and occupancy permits due to the use of OBO Information System V2, a digital system of approving permits. But a reliable source from his office confided that the city-run hospital has not been issued an occupancy permit. In either case, then, there is no such thing as a partial or temporary occupancy permit. That is illegal”, matud ni Barrit.
Niadtong Septiyembre 18, 2021 gibuksan ang ikaduha ug ikatulong andana sa CCMC. Nasayran nga gisugdan ang construction sa CCMC niadtong tuig 2015 atol sa administrasyon ni Bise Mayor Michael Rama kinsa mayor pa niadtong higayona.
Gi-demolish ang karaang CCMC building tungod kay namiligro ang estado niini gumikan sa 7.2 magnitude nga linog nga niigo sa Sugbo niadtong tuig 2013. —BDB (BANATNEWS)
- Latest
