Mga istraktura nga naka-ali sa right of way giguba na

CEBU, Philippines — Nahitabo kagahapon sa buntag ang pagguba sa mga istraktura nga nakababag sa road right of way sa likod nga bahin sa Villa San Jose Subdivision, Barangay San Jose Siyudad sa Sugbo.

Kini human wa mahinayon ang clearing operation niadtong September 14, 2021 kay nangayo og usa ka semana nga lugway ang tag-iya sa mga panimay nga maapektuhan.

Giklaro ni konsehal Jerry Guardo Chairman sa Committee on Infrastructure nga dugay na kaayo ang pag-trabaho sa alternative road right of way nga gihatagan nila og extension nga duha ka buwan hinungdan nga kagahapon ila na nga gipadayon ang clearing operation.

Pinaagi sa pag-abag sa mga sakop sa PROBE ingon man sa engineering department natigayon ang pagguba sa mga panimay nga nakababag sa agianan diin ang uban boluntaryong niguba sa ilang mga istraktura.

Suma ni konsehal Guardo nga mokabat sa 200 ka mga household ang maapektuhan sa pagsirado sa backgate sa Villa San Jose Subdivision.

Gikinahanglan nga mahawanan na ang road right of way aron naay kaagian ang mga residente sa likod nga bahin sa subvision tungod kay sirad-an naman ang backgate sa subdivision human nireklamo ang homeowners association nga sulod ug gawas ra ang mga residente nga wa magpuyo sa lugar.

Ang korte mipagawas na sab og desisyon labot niini diin sa October 12 kinahanglan masirad-an na ang back gate.

“Kami ni-catch up gyud mi before sa deadline kay October 12 would be the deadline unya initial talks namo sa homeowners definitely ila gud isirado so we wanted to avoid the incident nga magbinatoay na sab ba, so we make sure nga before sa October 12 nga deadline maabli na gyud ang alternative road right of way para katong 200 families nga nagpuyo didto sa likod makaagi na gyud sila duna nay kaagian nila”, segun pa ni Guardo. —MEL (BANATNEWS)