Militanteng pundok nikondenar sa mga palpak sa administrasyong Duterte
CEBU, Philippines — Ang mga militanteng pundok sa Siyudad sa Sugbo nagpahigayon og lihok protesta atol sa ika-49 nga kasaulogan sa Martial Law kagahapon.
Gisinggit nila nga si Presidente Rodrigo Duterte ug kanhi presidente Ferdinand Marcos pareho ra.
Ang Bagong Alyansang Makabayan (BAYAN)-Central Visayas uban sa laing progresibong grupo nagpahigayon og lihok protesta diha sa kadalanan ug gikondenar nila ang giingong mga ka palpak sa administrasyong Duterte.
Napulo ka police personnel ang gi-deploy diha sa lugar diin gipahigayon ang lihok protesta.
Ang grupo gihatagan og pagtugot nga makapadayag ug makapagawas sa ilang yangungo sulod sa singko minutos ug human niini giawhag sila nga buwag-buwag.
Si Jaime Paglinawan, chairman sa BAYAN Central Visayas nagkanayon nga si Presidente Duterte misunod sa tunob sa kanhi diktador nga si Ferdinand Marcos.
Giingong si Duterte wala makahatag sa kausaban nga iyang gisaad niadtong tuig 2016.
Nanawagan usab ang grupo og tinud-anay nga agrarian reform, pagtapos sa ENDO ug contractualization.
Laing gipanawagan nila mao ang mas maayong pagtubag sa COVID-19 pandemic ug dili ang materialistic approach nga daghang kinabuhi ang makalas.
Ang BAYAN Central Visayas nanawagan usab og hustisya sa kamatayon sa mga human rights worker nga sila si Butch Rosales, Father Rustico Tan, Elena Tijamo ug human rights lawyer Atty. Rex Fernandez nga gipusil patay sa niaging buwan. BDB (BANATNEWS)
- Latest
