Mga tinun-an sa TCC gipili ang manarbaho kaysa mag-module

CEBU, Philippines — Ang mga tinun-an sa Talisay City College mas mopili nga manarbaho kaysa motungha ubos sa modular nga paagi.

Kini maoy naobserbahan sa kadagkoan sa eskwelahan human ilang nakita nga anaa pa sa 80 porsyento ang nagpa-enroll.

Matud ni Dr. Richel Bacaltos, presidente sa TCC nga ilaha nang gituyok ang matag barangay aron sa pag-awhag sa mga bata nga magpa-enroll.

Giingong kasagaran nga rason nga ilang mabati gikan sa mga kabataan mao nga mas pilion nalang nila nga motrabaho tungod kay wala ra sila’y makat-onan sa modular nga paagi sa pagtungha.

Si Bacaltos ug ang mga kaubanan niini nagsabot nga kong mahimo aduna sila’y adlaw nga makapahigayon og usa ka oras online nga klase.

Samtang ang nagpuyo sa lugar nga menos ang internet adtuon kini sa magtutudlo bisan kausa sa usa ka semana aron adunay interaction sa tinun-an ug magtutudlo.

Karong adlawa mao na ang ilang orientation diin sa adlaw nga Lunes sa sunod semana mao na ang pagsugod sa ilang klase.

Gipasabot ni Bacaltos nga bisan og nagsugod na sila mahimo pa gihapon sila nga modawat sa gusto nga magpa-enroll.

Nunot niini, pipila ka mga pampublikong tunghaan sa Central Visayas andam na nga mobalik sa ilang face to face classes.

Matud sa Department of Education (DepEd0-7 nga gihangop nila ang tinguha sa presidente.

Kini human sa paghatag og pagtugot ni Presidente Rodrigo Duterte sa pagpahigayon og limited face to face classes sa nasud.

Si Director Salustiano Jimenez, nikonpirma nga ang Central Visayas lakip sa rehiyon nga napilian nga mobalik sa face to face classes.

Gibutyag ni Jimenez nga nagpaabot nalang sila sa official communication ug suwat nga gikan sa Central Office ug malaumon sila nga madayon kini. (BDB) (BANATNEWS)