Pag-trabaho sa merkado gitinguha sa brgy officials

CEBU, Philippines — Mihangyo ang mga barangay officials sa Labangon ngadto sa Cebu City Government nga unta mapirmahan na ang demolition permit sa ilang karaan nga merkado nga dugay na nila gipaabot aron makasugod na sila og trabaho niini.

Kahinumduman nga ang mga manindaay sa karaan nga merkado sa Barangay Labangon temporaryo nga gibalhin sa hagip-ot nga lugar nga sakop ra gihapon sa Labangon sukad niadtong buwan sa Pebrero ning tuiga.

Kini human girekomendar sa Office of the Building Officials (OBO) kay delikado na nga mahugno ang building.

Si Konsehal Jun Masong, miasoy nga duna na sila’y P145 million nga pundo nga gikan sa national government alang sa maong tumong apan sila nabalaka nga kun madugay og release ang demolition permit basin og mabalik ang pundo sa national government.

“Mao nay pangutana nga dili gyud ko katubag nganong ilang dugay-dugayon kay luoy kaayo ang mga market vendors kun ilang dugayon unya ang building sad dili sad kami maoy nagkuan ana, nag advice nga pahawaon sila, ang OBO mismo kay delikado na ang building, malusno”, ni Konsehal Masong pa.

Ang mga manindahay mihulagway nga lisod ilang kahimtang kay gawas nga tuyuon ang nahimutangan nila karon, atbang sab sila sa tunghaan nga gihimong isolation center, ug dyutay ra ang ilang mga customer, wa usab sila’y tubig ug kuryente.

Si Cebu City Acting Mayor Michael Rama mipasalig nga pirmahan dayon ang gipangayo nga permit sa Barangay Labangon aron masugdan na nila og trabaho ang karaan nga merkado. —MEL (BANATNEWS)