Mga sementeryo planong isirado atol sa kalag-kalag

CEBU, Philippines — Gibutyag ni Konsehal Phillip Zafra, chairman sa committee on peace and order sa konseho sa Siyudad sa Sugbo nga usa karon sa gikonsiderar o inisyal nga plano ang pagpagsirado sa mga sam-ang atol sa kalagkalag  karong tuiga aron malikayan ang pagdumog sa mga tawo.

Nasayran nga malamposon sa niaging tuig ang maong polisiya diin gipasayo sa kagamhanan sa siyudad ang schedule sa pagduaw sa katawhan sa lubong sa ilang minahal sa kinabuhi.

Matud ni Zafra nga aduna pay mga panagtigom kabahin niini aron ma-finalize o matun-an ang mga pamaagi sa pagsaulog kalag-kalag.

Samtang si Acting Mayor Michael Rama, nibutyag kagahapon nga umolon na usab og balik ang “Oplan Kalag-Kalag” ug gikatakdang magtigom ang mga tinugyanan niini karong semanaha.

Usa sa plano ni Rama nga himuon ang pagtamod sa maong okasyon duha ka semana sa dili pa ang kalag-kalag ug laing duha ka semana inig kahuman sa maong kasaulogan.

Nasayran usab nga sa niaging tuig gihimo ang pagtamod sa kalag-kalag sulod sa usa ka buwan ug gisirado ang mga sementeryo pagka sa Oktubre 30 hangtud sa Nobiyembre 3.

Niadtong higayona nitumaw usab ang mga sugyot nga mas maayong buhaton usab kini karong tuiga.

Ang pagpasira sa mga sam-ang sa niaging tuig dili lang kini sa Sugbo gihimo apan sa tibuok nasud diin tumong niini nga walay mahitabong pundok-pundok sa mga tawo diha sa mga sam-ang aron malikayan ang pagkatap sa COVID-19. Nakasulod lang diha mga sam-ang atol sa kalag-kalag sa niaging tuig mao ang kaparian, sakristan, lay ministers ug operator sa sound systems alang sa pagpahigayon sa Santos nga Misa alang sa mga nagpamisa. BDB (BANATNEWS)