Tulo ka suspetsadong durugista sikop sa buy bust

CEBU, Philippines — Tulo ka lalaki ang nasikop atol sa gipahigayong buy bust operation sa Police Drug Enforcement Group ug Sawang Calero Police Station diha sa Block 5, Barangay Sawang Calero, Dakbayan sa Sugbo niadtong Huwebes.

Ang suspetsado mao si Axeil James Presbitero, hingkod ang panuigon, subject sa buy bust ug sila si Joseph Sequillo, 59-anyos, Angelo Tañag, 40, kargador sa Pasil Fish Port.

Giingong si Presbitero bodegero kini sa ginadiling drugas.

Si Police Major Alejandro Batobalonos, Deputy Regional Chief sa PDEG Visayas (SOU)-7, maoy nangulo sa nahisgutang operasyon.

Nasakmit gikan sa mga suspetsado ang pinutos nga ginadiling drugas nga nitimbang ngadto sa 220.5 gramos ug nibalor tanan ngadto sa P1.4 milyon ug buy bust money.

Giingong ang subject sa maong operasyon idlas kaayo kini ug nakaikyas kaniadto sa mga pagpangronda sa kapolisan. Ang mga suspetsado kinsa natingkagol karon sa detention cell sa Sawang Calero Police Station gikatakdang pasakaan og tukmang kaso sa nahimo nilang kalapasan. BDB (BANATNEWS)