Salvador andam mag-kongresista; Reluya suportado sa Alayon

CEBU, Philippines — Bukas si Bokal Jose Mari “Tata” Salvador sa paglansar pagkakongresista sa segundo distrito sa umaabot nga piniliay sa sunod tuig.

Si Salvador nipadayag nga andam na siya modagan isip kongresista sa nahisgutang distrito apan mangayo una siya og bendisyon gikang kang Gobernador Gwendolyn Garcia.

“Nag-agad ra ko sa atong gobernador. Ang atong tan-awon naa man si Gov. Gwen nga atong lider of course mangayo sad ta og blessing sa atong gobernador”, matud ni Salvador.

Sa pagkakaron miyembro si Salvador Nationalist People’s Coalition (NPC) apan matud niya nga mosuporta siya sa One Cebu, ang lokal nga partido sa mga Garcia. Sa pagsuroy didto sa segundo distrito sa habagatang bahin sa Lalaiwgan sa Sugbo makita diha sa ubang mga establisamento ug mga balay ang tarpaulin ni Salvador nga adunay suwat nga “Himsog nga Serbisyo sa Segundo Distrito. Tata Salvador”.

Sa laing bahin, suportado sa Partidong Alayon si Mayor Lakambini “Neneth” Reluya sa Lungsod sa San Fernando sa sunod tuig nga piniliay.

Kini maoy gibutyag ni Mayor Gerald Anthony “Samsam” Gullas Jr. sa Dakbayan sa Talisay nga mao karon ang giila nga lider sa Partidong Alayon.

Matud ni Gullas nga ang Alayon nisuporta sa mga Reluya sa niaging piniliay ug ang grupo padayong mohatag sa ilang suporta kang Reluya kong subli kining magpapili isip mayor sa lungsod.

Niining ulahi lang, si Konsehal Philip Jude “PJ” Medalla ang gihugon-hugon nga maoy makig-atbang kang Reluya sa pagkamayor sa sunog tuig nga eleksiyon.

Nunot niini, ang pamilyang Reluya ug ang kaatbang niini sa politika nga pamilyang Canoy nag-uban sa Partidong Alayon.

Apan wala pa mohatag og komento si Medalla kabahin sa maong ulahing kalamboan.

Adunay mga hungihong nga magpapili usab sa pagkamayor ang usa sa mga kabanay sa pamilyang Canoy hinuon wala pa sila’y pormal nga anunsiyo niini. Gabriel C. Bonjoc/BDB (BANATNEWS)