CLO: Demolisyon pinasubay sa balaod

CEBU, Philippines — Gitataw sa Cebu City Legal Office nga balido ang gihimong clearing operation sa pipila ka tindahan diha sa Units 2 ug 3 sa Carbon Public Market.

Nasayran nga ang maong demolisyon kabahin kini alang sa pagsugod sa renovation sa Carbon Public Market ubos sa joint venture project alang modernisasyon sa maong merkado.

Gani gisiguro sa kagamahan nga adunay temporaryong pwesto ang apektado sa demolisyon samtang nagpadayon ang construction.

“All stallholders were informed that they would be able to return to their stalls upon completion of the modernization of the Carbon Market”, matud ni Gealon.

Matud ni Gealon nga pinaagi sa maong proyekto molapad usab ang kapasidad sa merkado diin gikan sa 1,200 ka stalls mahimo na unya kining 3,400 stalls.

Niining ulahi lang, gikwestiyon ni Sangguniang Kabataan Federation (SKF-Cebu City) President Jessica Resch ang demolisyon sa maong mga tindahan nga gihulagway niya nga dili makatawhanon.

Si Resch kinsa ex-officio member usab sa konseho sa Siyudad sa Sugbo nagkanayon nga kasamtangang nagsagobang ang katawhan sa pandemiya busa dili kaayo haom ang panahon sa demolisyon ug lisod kaayo ang kahimtang karon sa katawhan.

Ang maong mensahe ni Resch iyahang gipabuhagay atol sa iyang previlege speech sa konseho sa niaging adlaw.

Sayo pa, giklaro sa Market Operations Division (MOD) nga aduna sila’y notisya sa wala pa gihimo ang clearing operation ug nag-agi gyud sila og proseso. BDB (BANATNEWS)