Igo nga suporta sa gobyerno sa mga MSMEs gisugyot

CEBU, Philippines —  Naglisod ang mga gagmay’ng negosyo sa pagpadayon sa ilang operasyon tungod sa pagsaka sa presyo sa mga produkto, gasto sa operasyon ug mga proseso sa gobyerno nga mokonsumo sa ilang panahon ug puhunan.

Para sa mga micro, small ug medium enterprises (MSMEs), ang dugay nga pagproseso sa permits ug requirements, dugang nga bayronon ug balik-balik nga inspeksyon mahimong dugang pas-anon ilabina kung limitado ang ilang kapital.

Gipadayag ni Sen. Bam Aquino, chairman sa Senate Committee on Trade, Commerce and Entrepreneurship, ang maong mga kabalaka atol sa hearing sa komite niadtong Biyernes, Septiyembre 11.

Matud ni Aquino, dili angay nga parehason ang mga requirements alang sa gagmay’ng tindahan ug dagkong kompanya tungod kay lahi-lahi ang ilang kapasidad ug operasyon.

Dugang sa senador nga ang panahon nga magasto sa pagproseso sa mga papeles mahimong panahon usab nga dili maka-abli ang usa ka negosyante sa iyang tindahan.

Mas lisod usab ang kahimtang sa mga negosyo nga maigo sa kalamidad, diin kinahanglan pa silang mogasto alang sa pag-ayo ug pagpadayon sa operasyon samtang nag-atubang usab sa taas nga presyo sa mga materyales, gasolina ug ubang produkto.

Gipasaka usab ni Aquino ang isyu sa korapsyon ug pagpangayo og ilegal nga bayad nga mahimong makaapekto sa gagmay’ng negosyante nga naningkamot nga makabangon ug mapadayon ang ilang negosyo.

Gidasig niya ang mga ahensya sama sa Bureau of Internal Revenue (BIR), Bureau of Fire Protection (BFP) ug Food and Drug Administration (FDA) nga tan-awon pag-usab ang ilang mga proseso alang sa gagmay’ng negosyo.

Lakip sa mga gisugyot nga lakang ang pagpasimple sa pipila ka requirements, pagpaubos sa BFP inspection fees ug pagpasayon sa proseso sa FDA, ilabina alang sa mga negosyo nga limitado ang kapasidad.

Aduna usab mga pending nga proposal sa Senado nga nagtumong sa pagpalapad sa suporta alang sa MSMEs, lakip ang mga online seller, freelancer, content creator ug ubang gagmay’ng negosyo nga nag-operate pinaagi sa digital platforms.

Ang MSMEs naglangkob sa hapit 99 porsyento sa mga rehistradong negosyo sa nasud ug naghatag og duha sa matag tulo ka trabaho.