Usa ka bata patay, laing usa angol human madasmagi og SUV sa LGU sa Barili

CEBU, Philippines — Patay ang usa ka 10-anyos nga bata’ng lalaki samtang naangol ang 8-anyos niining kauban human sila nadasmagan sa usa ka SUV nga nakarehistro sa local government unit (LGU) sa Lungsod sa Barili samtang nagsakay og bisikleta ngdto sa provincial road sa Barangay Candugay, Lungsod sa Barili niadtong Martes sa udto.

Ang namatay usa ka pupil sa grade 4 pupil sa Candugay Elementary School ug residente sa nahisgutang barangay.

Samtang ang 8-anyos nga bata’ng lalaki, residente usab sa maong barangay ug usa ka grade 3 pupil sa maong eskwelahan.

Ang nakadasmag mao ang puti nga Mitsubishi Montero SUV nga nakarehistro sa LGU Barili ug gimaneho ni alayas “Arthur”, 37-anyos, residente sa Barangay Bolocboloc, Lungsod sa Barili.

Base sa imbestigasyon sa Barili Municipal Police Station gikan sa barangay hall sa Candugay ang SUV ug padulong kini sa munisipyo samtang ang duha ka bata padulong na unta sa ilang panimalay.

Pag-abot diha sa lugar nga nahitaboan giingong ni-overtake ang SUV sa usa ka motorsiklo nga nag-una niini apan nilapas kini sa pikas lane nga gisubay sa mga biktima.

Gituohang kusog ang dagan sa SUV ug wala na makapreno ang drayber hinungdan nga nadasmagan ang duha ka bata nga nagsakay sa bisikleta.

Daling gidala ang mga biktima ngadto sa tambalanan apan gideklara nga patay na nga naabot sa tambalanan ang 10-anyos nga bata samtang ang 8-anyos niyang kauban gibalhin sa usa ka pribadong tambalanan.

Ang drayber sa SUV ubos kini sa kostudiya sa kapolisan sa lungsod ug posibleng mag-atubang kini og kasong reckless imprudence resulting in homicide, serious physical injuries ug damage to property.

Subay niini, gikompirma ni Barili Mayor Pablo John “John-John” Garcia IV nga ang municipal vehicle gimaneho sa usa ka municipal driver nga ubos sa oras sa iyang trabaho dihang nahitabo ang aksidente.

Matud ni Garcia nga gisugo ang drayber sa paghatud og sulat ngadto sa usa ka barangay ug padulong na unta kini nga mobalik sa municipal hall dihang nahitabo ang insidente.

Si Garcia nagkanayon nga ang tukmang mga sirkumstansiya sa aksidente kinahanglang matino pinaagi sa imbestigasyon sa mga otoridad.

Si Garcia nipadayag kini sa iyang kasubo sa nahitabong aksidente ug nibisita kini sa pamilya sa 10-anyos nga bata ug nitunol sa iyang hinabang.

Gipadali usab niya ang pagbalhin ug pagpa-confine sa 8-anyos nga biktima ngadto sa usa ka pribadong ospital sa Dakbayan sa Sugbo aron masiguro nga makadawat kini sa gikinahanglang pag-atiman.

Gipahinumduman usab ni Garcia ang tanang municipal driver nga magmatngon samtang nagmaneho sa dalan.

“Bisan pa og official duty, kinahanglan pirming mag-amping ug unahon ang kaluwasan sa atong mga katawhan”, matud ni Garcia. —Shiela Mae H. Agrabio, Mitchelle L. Palaubsanon (BANAT NEWS)