Usa ka lalaki patay human pusila sa wala mailhing criminal

CEBU, Philippines — Patay ang usa ka 42-anyos nga lalaki ug kanhi piniriso human kini pusila sa wala mailhing criminal diha sa Dumpsite Whiteroad, Barangay Inayawan, Dakbayan sa Sugbo kagahapon sa kadlawon.

Giila ang biktima nga si Daniel Mondego Paiz, giingong usa ka ex-convict, residente sa maong lugar.

Ang biktima dali kining gidala ngadto sa tambalanan apan giderklara kini sa doktor nga patay na nga naabot sa tambalanan.

Matud ni Gloria Mondego, iyaan sa biktima nga posible nga kalabotan sa ilegal nga drugas ang motibo sa pagpamusil tungod sa kanhi’ng mga kaso sa biktima diin nalambigit kini sa ilegal nga drugas.

Si Jonel Escalante, pag-umangkon sa biktima nagkanayon nga alas 4:00 sa kaadlawon nihangyo siya sa iyang uyoan nga ayohon ang tubo sa tubig nga adunay buslot.Apan wala madugay gipukaw na lang siya ug gipahibalo nga gipusil ang iyang uyoan.

Gikataho nga nakita ang biktima nga adunay kauban nga babaye samtang naglakaw padulong sa karsada sa may dumpsite ug kalit lang nadungog ang sunod-sunod nga mga buto sa armas.

Nakita na lang ang biktima nga naghigda ug naligo sa kaugalingo’ng nagdugo. Nakuha sa kapolisan gikan sa lugar nga nahitaboan ang unom ka basiyo sa bala sa wala pa matino nga kalibre sa armas. Ang kapolisan nagpahigayon og follow-up nga imbestigasyon sap ag-ila sa criminal ug papiho sa hinungdan sa maong pagpamusil. (BANAT NEWS)