Lalaki nga namasangil ug nagpakita sa iyang kinatawo sikop

CEBU, Philippines — Gidakop sa kapolisan ang usa ka 19-anyos nga lalaki human kini giingong naghubo sa iyang purol ug nagpakita sa iyang kinatawo ngadto sa usa ka 20-anyos nga dalaga diha sa national highway sa Barangay Langtad, Dakbayan sa Naga niadtong Lunes sa gabii.

Giila sa kapolisan ang suspetsado nga si Lawrence Daniel Bontuyan, ulitawo, residente sa Sitio Kamagong, Barangay Lahug, Dakbayan sa Sugbo.

Base sa imbestigasyon sa Dakbayan sa Naga nga naghulat ang biktima og pasaheroang jeep kauban ang duha niya ka higala ug kalit lang niabot ang suspetsado nga gituohang nakainom og ilimnong makahubog.

Giingong gikomprontase sa suspetsado ang biktima ug gipasanginlang maoy nangawat sa iyang kwarta.

Namalibad ang dalaga ug ang kauban niini sa pasangil ni Bontuyan apan giingong nagpadayon ang suspetsado sa pagpanginsulto ug pagsulti og dili maayong mga pulong ngadto sa biktima.

Nisamot ang kahadlok sa biktima dihang giingong gihubo sa suspetsado ang iyang purol ug gipakita ang kinatawo niini ngadto sa biktima.

Usa ka concerned citizen ang nitawag sa City of Naga Police Station ug nangaho kini og tabang kalabot sa insidente.

Ang kapolisan daling niresponde sa maong taho ug giuban sila sa complainant ug mga saksi sa pagpangita sa suspetsado.

Ang suspetsado naabtan kini diha sa usa ka beach resort sa Barangay Langtad ug gisikop sa mga polis.

Ang suspetsado gikatakdang pasakaan kini og tukmang kaso sa nahimo niining kalapasan. (BANAT NEWS)