Mas lig-on nga koneksiyon sa mga rehiyon sa East Asia gitutokan

CEBU, Philippines — Gitutokan karon sa Cebu ang mas lig-on nga koneksiyon sa mga rehiyon sa East Asia ilabi na sa direct flights ug investments samtang nag-host ang probinsiya sa 19th General Assembly sa East Asia Inter-Regional Tourism Federation (EATOF).

Matud ni Cebu Governor Pamela Baricuatro nga gusto sa probinsiya nga gamiton ang international nga forum aron mas mapaila ang Cebu ug maablihan ang dugang oportunidad alang sa turismo, negosyo ug ekonomikanhong kalamboan.

Lakip sa gustong hisgotan sa gobernador ang mas maayong air connectivity tali sa Cebu ug sa mga rehiyon nga sakop sa EATOF ilabi na ang posibilidad sa direct flights.

Gipadayag ni Baricuatro nga usa usab sa iyang prayoridad ang pagpangdani og investors sa Cebu subay sa iyang gipamahayag sa iyang State of the Province Address (SOPA).

Gilaoman sa gobernador nga ang mas lig-on nga koneksiyon ug kooperasyon sa mga rehiyon sa East Asia makatabang usab sa pagpalambo sa turismo sa Cebu.

Sa iyang opening speech, si Baricuatro nagkanayon nga dili lang turismo ang mahimong benepisyo sa EATOF apan apil ang cultural exchanges, sports tourism, connectivity, investment, sustainable destination development ug people-to-people exchanges.

Matud usab ni Baricuatro nga nag-atubang og nagkadaiyang hagit ang industriya sa turismo sama sa climate change, environmental pressures, connectivity ug paspas nga pag-uswag sa mga destinasyon hinungdan nga importante ang pagtinabangay sa mga rehiyon.

Ug gusto sa Cebu nga ang mga kasabotan ug resolusyon gikan sa assembly dili lang kutob sa papel apan mahimong actual nga mga programa, exchanges, investments ug oportunidad alang sa katawhan.

Samtang, si Bise Gobernador Glenn Soco nagkanayon nga ang Cebu dili lang usa ka destinasyon alang sa mga turista apan usa usab ka gateway nga nagkonektar sa East Asia pinaagi sa airport, pantalan ug mga tawo niini.

Matud ni Soco nga ang EATOF dili lang maghisgot kabahin sa turismo apan apil usab ang negosyo ug uban pa’ng porma sa kooperasyon nga mahimong makabenepisyo sa ekonomiya ug mga komunidad.

Samtang si Gangwon State Vice Governor for Economic Affairs Shin Weon-Chul nidayeg sa Cebu isip host sa 2026 EATOF gathering.

Ang 19th EATOF General Assembly giabuksan kagahapon sa Mactan Expo Cebu kinsa nitambong ang governors, heads of delegation, tourism officials ug stakeholders gikan sa nagkadaiyang miyembro sa rehiyon sa East Asia.

 Lakip niini ang Cebu, Gangwon State sa South Korea, Tottori sa Japan, Jilin sa China, Töv sa Mongolia, Sarawak sa Malaysia, Quang Ninh sa Vietnam, Luang Prabang sa Laos ug Siem Reap sa Cambodia. (BANAT NEWS)