Archival nimando pagpahugot sa operasyon batok sa ilegal nga sugal
CEBU, Philippines — Gimandoan ni Cebu City Mayor Nestor Archival, Sr. ang Cebu City Police Office (CCPO) nga hingusgan ang operasyon batok sa tanang matang sa ilegal nga sugal sulod sa siyudad.
Gitahasan ni Archival nga mangulo sa operasyon ang officer-in-charge sa CCPO nga si Police Colonel Ricky Sumalde niadtong Martes, Septiyembre 1, 2026.
Ubos sa mando ni Archival nga tutokan ang tanang matang sa sugal lakip na ang Small Town Lottery (STL), Lotte, e-sabong, sabong, ug uban pa’ng samang kalihokan sa sulod sa siyudad.
Base sa taho sa Cebu City News, ipaususi usab ni Archival kong ang mga establisamento ug operator sa mga sugal aduna ba’y hustong permit, lisensiya ug uban pa’ng gikinahanglang otorisasyon sa wala pa sila tugoti sa pagpahigayon sa operasyon.
Kalabo sa sabong, gipahinumduman sa mayor ang hugtanong pagsunod sa City Ordinance No. 1447 nga giamendahan gikan sa City Ordinance No. 2806 lakip ang pagsunod sa lagda sa paglisensiya sa cockpit o sabongan, mga gitugot nga kalihokan, kwalipikasyon sa mga opisyal sa sabong ug mga kinahanglanon sa lokasyon ug gilay-on sa mga sabongan.
Gipasalig sa CCPO nga masunod ang mga mando sa mayor aron nga mapakgang ang ilegal nga mga sugal sa siyudad.
Padayon usab ang CCPO sa pagmentinar sa peace and order sa siyudad ubos sa giya ni Konsehal Paul Labra, tsirman sa Committee on Peace and Order. (BANAT NEWS)
- Latest
