Babaye’ng rider patay human nabanggai sa Ceres bus

CEBU, Philippines — Patay ang usa ka 19-anyos nga babaye human nabanggai sa Ceres bus ang iyang gimanehong motorsiklo ngadto sa National Highway sa Sitio Proper, Barangay Dayhagon, Lungsod sa Medellin niadtong Martes.

Giila ang biktima nga si alyas “Elle”, residente sa maong barangay.

Base sa imbestigasyon sa kapolisan sa Medellin Municipal Police Station nga padulong na unta nga mopauli sa ilang balay ang biktima gikan sa balay sa iyang classmate.

Ang biktima nagbiyahe sakay sa iyang motorsiklo paingon sa amihanan samtang ang Ceres bus nga gimaneho ni alyas “Fons”, 46-anyos nabiyahe usab kini sa opposite nga direksiyon paingon sa Barangay Hagnaya, Lungsod sa San Remigio.

Matud sa kapolisan nga giingong nisulod sa lane sa Ceres bus ang motorsiklo hinungdan nga nabanggaan kini sa maong bus.

Ug gumikan sa ka kusog sa impact nisaliring ang motorsiklo ug nalabay ang biktima diha sa karsada ug nakaangkon kini og grabeng kadaot sa iyang lawas.

Daling gidala ang biktima ngadto sa Cebu Provincial Hospital sa Dakbayan sa Bogo apan gideklara kini sa doktor nga patay na nga naabot sa maong tambalanan.

Human sa aksidente, boluntaryong nitahan sa iyang kaugalingon si Fons ngadto sa kapolisan ug gipaubos kini sa kustodiya sa Medellin Municipal Police Station.

Si Fons posibleng mag-atubang kini og kasong reckless imprudence resulting in homicide ug damage to property.

Gipaubos sa alcohol ug drug testing si Fons subay sa Akta Republika 10586 kun “Anti-Drunk and Drugged Driving Act of 2013” aron matino kong dili ba kini ubos sa impluwensiya sa ilimnong makahubog ug ginadiling drugas samtang nagmaneho. (BANAT NEWS)