Suspek sa pagpusil patay sa iyang amigo nadakpan

CEBU, Philippines — Nadakpan sa mga operatiba sa Police Station 5 sa Cebu City Police Office (CCPO) ang usa ka 30-anyos nga lalaki nga giingong mipusil-patay sa iyang amigo sa Carbon Market, Barangay Ermita, Cebu City, atol sa hot pursuit operation sa Poblacion, Pardo, Cebu City.

Giila sa kapolisan ang suspek nga si Robert Regis Alonzo, nailhan usab sa alyas nga “Robert Pogoy,” residente sa Poblacion, Pardo.

Ang suspek nadakpan alas-12:30 sa kaadlawon niadtong Hulyo 29, 2026 sa sitio Kawayanan, Barangay Poblacion, Pardo, Cebu City.

Narekober gikan sa suspek ang usa ka .38 caliber revolver nga walay serial number, duha ka buhi nga bala, ug usa ka fired cartridge nga anaa sulod sa silindro sa maong armas.

Matud sa kapolisan, ang maong armas gituohang maoy gigamit sa krimen.

Ang insidente sa pagpamusil nahitabo sa hapon niadtong Hulyo 27, 2026 sa ikaduhang andana sa Unit III sa Carbon Market, Barangay Ermita.

Giila ang biktima nga si Vergel Marson, 30, residente sa sitio Capaculan, Barangay Tisa, Cebu City.

Matud pa ni Robert, nagkita sila pag-usab ni Marson niadtong Hulyo 27 diin giingong gihagad siya sa biktima nga mogamit og ilegal nga droga. Apan dihang nahurot ang ilang gigamit mibiya ang biktima aron mokuha pa og laing pakete sa shabu. 

Giangkon sa suspek nga sa pagbalik ni Marson, nakabantay siya nga may dala kini nga armas maong iya kining giunhan sa pagpusil.

Ang suspek gidala sa custodial facility sa Police Station 5 sa CCPO samtang giandam na ang mga dokumento alang sa pagpasaka og kaso. (BANAT NEWS)