44 na ka nasud nidapig sa Pilipinas sa West Philippine Sea

CEBU, Philippines — Niabot na og 44 ka mga nasud ang dayag nga nipakita og suporta sa 2016 Arbitral Award nga naghimong imbalido sa pagpangangkon sa China sa tibuok South China Sea. Kaning ilang suporta ilang gipadayag atol nga ang Pilipinas nagsaulog sa ika-10 nga anibersaryo sa kadaugan gikan sa Permanent Court of Arbitration sa The Hague.

Si Department of National Defense (DND) spokesman Arsenio Andolong miingong nga samtang nagdagan ang mga katuigan nagkadaghang mga nasud ang nidapig na sa Pilipinas sa pagbarog niini sa katungod ug pagpatigbabaw sa United Nations Convention on the Law of the Sea (UNCLOS) uban sa atong lokal nga mga balaod ug ang international nga mga balaod nga nagdumala sa kadagatan sa kalibutan.

Matud niya, “the international community stands firmly with us” kay naa nay “27 nations demanding respect for the Arbitral Ruling and another 17 explicitly backing it.” Sa gipagawas nga pamahayag kagahapon, si Andolong nagkanayon nga ang DND “stands in absolute solidarity with the Filipino people in reaffirming the 2016 Arbitral Award as the living, unyielding anchor of our national sovereignty and maritime policy.”

Sumala pang Andolong mahimong hubaron sa DND ang legal text aron kini mahimong reyalidad. Ang DND ug Armed Forces of the Philippines (AFP) matud pa niya “will unceasingly deploy assets to secure our archipelagic nation and continue to uphold the international rules-based order and international law by documenting and exposing illegal, coercive, aggressive and deceitful activities in our waters and EEZ (exclusive economic zone). We will demonstrate to the world that our actions are rooted in evidence, truth and international law – not propaganda.” — /IBM (BANAT NEWS)