Pepito hugtanong nibarog sa iyang pag-abstain sa pagbotar sa resolusyon

CEBU, Philippines — Hugtanong gibarogan ni Konsehal Winston Pepito ang iyang pag-abstain sa pagbotor sa resolusyon ni Bise Mayor Tomas Osmeña nga dili apilon ang South Road Properties sa Cebu Bus Rapid Transit (BRT) realignment.

Niadtong Hulyo 3, 2026 wala ipalabang sa konseho sa Dakbayan sa Sugbo ang gisugyot sa Department of Transportation (DOTr) nga realignment sa CBRT ug gikinahanglan nga ibalik kini sa orihinal nga rota nga gikan sa Barangay Bulacao paingon sa Barangay Talamban.

Matud ni Pepito nga pabor siya sa hingpit nga implementasyon sa orihinal nga BRT alignment nga giaprobahan niadtong 2014 sa National Economic and Development Authority diin aprobado usab ang loan niini sa World Bank ug Agence Francaise de Developpement (AFD) gipadayon ubos sa memorandum of agreement (MOA) nga gipirmahan ni Osmeña kinsa mao ang naglingkod nga mayor niadtong 2016.

Ug ang maong plano naglakip na sa duha ka rota nga mao ang SRP ug ang Bulacao–Talamban corridor.

Apan giklaro ni Pepito nga supak siya sa bisan unsang lakang nga kalit nga pagkansela sa rota sa SRP nga giisip niya nga dugay na nga nahimong kabahin sa giaprobahang transport plan alang sa siyudad.

Mahitungod sa iyang pag-abstain sa resolusyon, si Pepito nagkanayon nga ang resolusyon nagtumong sa pagsalikway sa realignment apan base sa mga plano nga gipresenta ngadto sa konseho wala siya’y nakita nga actual nga pag-realign sa mga rota.

Si Pepito nagkanayon nga aduna usab siya’y kabalaka kong aduna ba'y legal nga baroganan o praktikal nga epekto ang maong resolusyon.

Gipadayag ni Pepito nga nisugyot kini og amendasyon sa resolusyon nga unahon ang implementasyon sa Bulacao–Talamban route apan wala kini dawata sa konseho.

Nikwestiyon ang konsehal nganong wala dawata ang iyang sugyot nga ang giingon ni Osmeña nga ang tinuod nga tumong sa resolusyon mao lang ang paghatag og prayoridad sa Bulacao–Talamban corridor ug tungod sa pagsalikway sa iyang sugyot nikwestiyon usab ang konsehal kong prioritization ba gyud ang tinuod nga isyu.

Gibutyag usab ni Pepito nga dili na siya moapil og botar dihang iyang nasayran nga ang mga isyu adunay kalabotan sa SM, Ayala ug uban pa’ng developers.

Alang kang Pepito, ang isyu posibleng nahimo na’ng politikal nga kontrobersiya imbes nga ang iyang tumong usab sa pagduso nga apilon ang SRP mao ang mapalambo ang sestema sa pampublikong transportasyon sa siyudad. (BANAT NEWS)