DOE: Magpadayon ang kakulang sa kuryente sa Visayas

CEBU, Philippines — Ang Department of Energy (DOE) nagpasidaan nga magpadayon ang kakulang sa suplay sa kuryente sa Visayas grid, samtang nagpadayon ang pagpatuman og mga temporaryong interbensyon aron matubag ang “structural mismatch” tali sa generation ug transmission development.

Si DOE Secretary Sharon Garin sa usa ka virtual press conference kagahapon, Hunyo 1 miingon nga ang sitwasyon sa Visayas nagpabilin nga kritikal, tungod sa balik-balik nga kakulang sa suplay nga nagresulta sa yellow ug red alerts sa grid.

Gisaysay ni Garin nga dili dayon masulbad ang problema sa kuryente sa Visayas, kay ang oras sa pagtukod sa power plants dili kanunay magtupong sa pagpalambo sa transmission infrastructure.

Miingon siya nga samtang ang ubang generation facilities mokabat og tulo ka tuig sa pagtukod ug ang uban hangtod lima ka tuig, ang transmission upgrades ug grid integration kasagaran maulahi, nga hinungdan sa padayon nga kakulang sa suplay.

Gidugang niya nga target sa DOE ang pag-integrate og dugang kapasidad sa Visayas grid sulod sa bulan, apan giingon nga ang long-term stability magkinahanglan pa og padayon nga pagpalapad sa imprastraktura.

Gitaho usab ni Garin nga ang Visayas power grid usa sa pinaka-nakasalig sa renewable energy sa nasod, diin ang renewable energy mokabat og mga 45 porsyento sa total supply, mas taas kumpara sa national average nga 25 porsyento.

Bisan pa og positibo kini, giingon niya nga adunay mga hagit tungod sa intermittent nature sa solar ug wind power. Miingon siya nga ang renewable sources nagdepende sa kahimtang sa panahon, nga nagpasabot nga dili kini kasaligan isip standalone baseload energy source kung walay adlaw o hangin.

Tungod niini, ang Visayas grid nagpadayon sa pagsalig sa stable baseload ug mid-merit power plants aron masiguro ang kalig-on sa suplay.

Apan giangkon niya nga kulang pa ang lokal nga baseload capacity sa rehiyon ug nagdepende pa kini sa importasyon sa kuryente gikan sa Luzon ug Mindanao nga adunay sobra nga suplay.

Gisuportahan kini ni DOE Undersecretary for Energy Policy and Power Industry Management Mario Marasigan, nga miingon nga ang Visayas grid ubos gihapon sa dako nga pressure, ug ang suplay kasagarang kulang kumpara sa demand sa peak hours.

Miingon si Marasigan nga kagahapon, ang demand sa rehiyon miabot og sobra 2,700 megawatts samtang ang available supply mahimong mokanaog hangtod 2,044 megawatts, hinungdan sa balik-balik nga grid alerts.

Aron matubag ang shortfall, ang DOE nagpadayon sa pagkuha og dugang kapasidad pinaagi sa renewable energy projects nga halos 69 megawatts, uban sa interim solutions sama sa battery energy storage systems, modular generator sets, ug ancillary services. (BANAT NEWS)