Gunman, gidakop sa habal-habal

CEBU, Philippines — Habal-habal driver nakatabang sa pagdakop sa suspek sa pagpamusil ug nakapatay og babaye sa  niadtong Miyerkules sa hapon sa Barangay Buanoy, Balamban.

Ang biktima giila nga si Annaly Antiga Labustro, 40, dalaga ug residente sa Sitio Toong, Barangay Buanoy.

Ang suspek giila usab nga si Roland Gastador Linabog, 54, ug residente sa Barangay Lorega-San Miguel, Cebu City.

Sa imbestigasyon sa kapolisan,adunay testigo nga nakadungog sa mga sunod-sunod nga  buto  sa armas.

Sa dihang miduol siya sa maong dapit, iyang nakita ang suspek nga nagsunod sa biktima samtang padayon kining gapusil sa naulahi hangtod nga natumba ang babaye sa yuta.

Human sa pagpamusil, midagan ang suspek padulong sa highway apan gisinggitan sa mga tawo og “nakapusil na diri.”

Nakadungog niini ang habal-habal driver nga si Eduardo, 29 anyos, residente sa Barangay Buanoy uban sa usa ka 18-anyos nga lalaki nga ginganlang Mark hinungdan nga ilaha kining gigukod.

Hangtud nga ilaha kining naabtan ug gidakop pinaagi sa citizen’s arrest. Narekober gikan sa suspek ang usa ka .9mm nga revolver nga adunay usa ka bala ug upat ka basiyo nga kabhang sa bala.

Pag-abot sa mga sakop sa Balamban Police Station, gitugyan nila kini apil ang ebidensya.

Samtang ang biktima gidala dayon sa Balamban Rescue personnel ngadto sa Cebu Provincial Hospital–Balamban apan gideklarar siyang dead on arrival sa attending physician nga si Dr. James J. Rebollos.

Padayon pa sa imbestigasyon ang kapolisan aron masayran ang motibo sa pagpamusil. IBM BANAT NEWS