Lima ka adlaw nga trabaho sa city hall ug Kapitolyo gibalik na   

CEBU, Philippines — Gianunsiyo ni Cebu City Mayor Nestor Archival, Sr. nga napupos na ang pagpatuman sa 4-day workweek sa kagamhanan sa Dakbayan sa Sugbo ug ibalik na kini ngadto lima ka adlaw.

Sulod sa usa ka buwan, gipatuman kini sukad niadtong Abril 6 hangtud sa 30, 2026 diin tumong niini nga mokunhod ang konsumo sa kuryente ug ubang operational cost samtang gisiguro nga dili maapektohan ang mga batakang serbisyo sa publiko subay sa direktiba gikan sa Malacañang niadtong buwan sa Marso niining tuiga.

Matud ni Archival nga adunay pagkunhod sa kuryente ug tubig sa unang semana sa Abril apan sa ikaduha ug ikatulo nga semana nisaka kini.  Ug ipasuta ni Archival kong aduna ba’y leaking sa mga tubo sa siyudad.

Gawas niini, adunay mga buhatan nga wala nagpatuman sa 4-day workweek gumikan sa batakang serbisyo nga kinahanglan nga ipadayon sama sa Mayor of the Night sa IT Park.

Dugang sa mayor nga dako og gikatabang ang 4-day workweek sa pagdaginot sa enerhiya sa siyudad apan sa pagkakaron kinahanglan nga ibalik sa regular nga sestema ang paghatag sa serbisyo.

Sa laing bahin, nibalik na usab sa regular nga lima ka adlaw nga trabaho ang mga opisina sa Kapitolyo sugod niadtong Mayo 4, 2026.

 Pormal nga gihunong ang upat ka adlaw nga workweek pinaagi sa Executive Order No. 27, Series of 2026 nga gipirmahan ni Gobernador Pamela Baricuatro.

Ubos sa maong mando, ang tanang opisina sa probinsiya mopadayon na sa trabaho gikan sa Lunes hangtud sa Biyernes sa alas 8:00 sa buntag hangtud sa alas 5:00 sa hapon.

Ang lakang kabahin sa pagbalik sa normal nga operasyon aron mapalig-on ang paghatag og serbisyo sa publiko.

Matud sa Kapitolyo nga importante nga mapasayon ang koordinasyon sa nagkadaiyang departamento ug mapalambo ang frontline services.

Ang upat ka adlaw nga workweek gisugdan niadtong Marso 2026 ubos sa Executive Order No.16 isip tubag sa problema sa enerhiya.

Ug sa maong sestema ang mga empleyado mosulod gikan Lunes hangtud sa Huwebes sa alas 8:00 sa buntag hangtud sa alas 7:00 sa gabii.

Apan matud ni Atty. Ace Durano, provincial administrator nga adunay daghang konsiderasyon sa pagbalik sa daang schedule.

Gibutyag ni Durano nga adunay hangyo gikan sa nagkadaiyang opisina nga ibalik na ang normal nga trabaho.

Bisan pa sa pagbalik sa lima ka adlaw nga trabaho giklaro sa Kapitolyo nga magpadayon gihapon ang mga lakang sa pagdaginot sa enerhiya lakip niini ang pag-regulate sa paggamit sa aircondition sa mga opisina.

Padayon usab ang pagpugong sa dili importante nga biyahe sa gobiyerno aron makamenos sa konsumo sa gasolina. (BANAT NEWS)