Duha ka babaye patay sa pagpamusil

CEBU, Philippines —  Duha ka mga babaye ang patay samtang tulo ang angol sa duh aka insidente sa pagpamusil sa probinsya sa Sugbu niadtong adlaw nga Biyernes , Marso 6, 2026. Nahitabo kini samtang ang nasud nagselebrarar sa National Women’s Month.

Sa pagpamusil sa Sitio Magsaysay, Barangay Tabunok, Lungsod sa Tabuelan niadtong Biyernes sa gabii namatay si Elena Caritero Cuerpo samtang ang mga naangol ang mga kabanay nga silang Floramae Cualipano ug Glendel Caritero Cuerpo pulos nagpuyo sa naasoy nga dapit.

Ang gitumbok nga mga suspetsado ilaha ra sab mga kadugo nga  sila si Bienvenido Balais Macaraeg, 47, ug Christian Clifford Cuerpo Macaraeg, 23, mga silingan ra pud sa mga biktima.

Sa inisyal nga imbestigasyon sa Tabuelan Municipal Police Station nasuta ang mga suspetsado nga sila si Bienvenido ug Christian Macaraeg pulos hubog nga nangadto sa panimalay nila ni Floramae Cualipano.

Apan sa walay igong rason ang suspek nga si Bienvenido gisyagitan ang live-in partner ni Floramae mga si Glendon Debalucos Caritero, 18 anyos.

Matud pa diretsong nibunot og armas si Bienvenido ug gipusil si Glendon, apan nakalikay kini ug ang naigo mao ang iyang kaipon nga Floramae.

Daling nangikyas ang mga suspek ug nanguli sa ilahang panimalay.  Dihad-iha gipakalma nilang Elena ug Glendel Cuerpo si Beinvenido apan hasta sila gipamusil niini.

Sa dihang nasayod si Glendon nga nasamdan ang iyahang kaipon nga si Floramae niadto kini sa mga suspetsado ug gikompronta si Bienvenido ug diha na nahitabo ang panaglayog sa duha ug nag-ilog sa armas.

Matud pa nga nadisarmahan ni Glendon si Beinvenido ug gipusil niya kini katulo gamit ang nahisgutang armas. Ang laing suspek nga si Christian dalidaling midagan ug wala na mopakita.

 Si Bienvenido, Elena ug Glendel gidala sa Tuburan District Hospital apan si Elena nakabsan gyud sa kinabuhi.  Samtang si Floramae kay gidala sa Bogo City Provincial Hospital.

Naka-hospital arrest si Bienvenido human kini naangol samtang si Christian nadakpan ug nakuhaan og usa ka kalibre .45 nga armas.

Sa laing insidente sa pagpamusil, patay sab ang  usa ka babaye human kini gipusil sa wala pa mailhing tawo diha diha sa Barangay Langtad, Lungsod sa Argao niadtong Biyernes sa gabii, Marso 6, 2026.

Ang biktima mao si Maria Joylyn Remoroza Loyola, nagpuyo sa Barangay Langtad sa maong lungsod.  Base sa imbestigasyon sa Argao Municipal Police Station ang biktima naglingkod sa lingkuran sa dihang kalit niabot ang usa ka lalaki ug diretso  kining gipusil makadaghang higayon.

Padayon pa ang imbestigasyon sa kapulisan sa Lungsod sa Argao ilabi na sa motibo sa pagpamusil. Nihimo sab og hot pursuit operation ang kapulisan batok sa suspetsado.

Nasayran nga ang biktima dili lumad taga Lungsod sa Argao ug taga Davao kini.