LCPO wala pa gihapoy kasayuran bahin sa pagpatay sa custom broker

CEBU, Philippines — Blangko pa gihapon ang kapolisan sa Lapu-Lapu City Police Office (LCPO) alang sa pag-ila sa mga suspetsado nga nagpusil patay sa usa ka custom broker.

Si Police Captain Edcel Petecio, tigpamaba sa LCPO miingon nga ang biktima nga si Jaylee Tayong, 34 anyos nga taga Barangay Yati sa Lungsod sa Liloan ang nagsakay sa iyang motorsiklo gikan sa iyang gitrabahoan sa Mactan Export Processing Zone sa  Barangay Pusok sa maong dakbayan.

Gisundan kini sa duha ka wala hiilhing mga lalaki nga nagsakay usab og motorsiklo apan paghidangat sa Sitio Bukid-Bukid sa  Barangay Pajac, Siyudad sa Lapu-Lapu kalit lamang kining gipusil sa ulo ug sa dughan nga maoy hinungdan sa kamatayon niini.

Matud pa ni Petecio nga gawas nga nagtrabaho ang biktima sa MEPZA mao usab kini ang tighatod ug kuha sa iyang asawa nga nagtrabaho usab sa usa ka establisamento sa Barangay Basak sa maong siyudad. Si Petecio miingon nagtinabangay karon ang kapolisan sa LCPO kauban sa mga sakop sa Intelligence Unit sa paghimo og mga pakisusi alang sa pag-ila sa mamumuno sa biktima. IBM BANAT NEWS