Duha patay sa engkwentro tali sa mga polis ug wanted person

CEBU, Philippines — Duha ang patay sa nahitabong engkwentro atol sa pag-serve og warrant of arrest sa kapolisan sa Tagbilaran City Police Station Bohol Police Provincial Office batok sa top 2 most wanted person provincial level ngadto sa Purok-3, Upper Candait, Barangay Dampas, Tagbilaran City, Bohol.

Ang nakalas mao si Adonis Chavez Gequillo kinsa naila usab sa pangalan nga Rey Daño Gequillo ug alyas “Ondoloy”, 40-anyos, nagpuyo sa Sitio Candait, Barangay Dampas, Tagbilaran City, Bohol ug nabutang isip top 2 most wanted person.

Nakalas usab ang kauban ni Gequillo nga si Francis Cesar Lumothang, hingkod ang panuigon, taga Tagbilaran City, Bohol.

Nasayran si Gequillo adunay warrant of arrest sa kasong murder ug frustrated murder nga giluwatan ni Regional Trial Court Judge Josephus Adel Baterna sa Branch 49 sa Tagbilaran City.

Ang warrant of arrest ni Gequillo gumikan kini sa iyahang kaso niadtong 2024 diin ang mga downline sa iyahang ilegal nga kalihokan ang biktima.

Ang Tagbilaran City Police Station pingulohan ni Police Lieutenant Colonel John Kareen Escober ang ni-serve sa WOA batok sa suspetsado.

Apan dihang dakpon na unta nila si Gequillo giingong gipabuthan sa mga suspetsado ang kapolisan hinungdan nga nibawos kini sa pagpabuto.

Ang mga suspetsado nangaigo kini sa pagbawos sa kapolisan kinsa daling nanawag og ambulansiya sa City Disaster Risk Reduction and Management Office.

Gikataho nga ang mga suspetsado wala nay pulso ug wala na maglihok pag-abot sa ambulansiya.

Nasakmit sa mga kapolisan gikan sa mga suspetsado ang kalibre .35 nga armas, usa ka KG9, shabu ug usa ka silver Toyota Vios nga walay plate number. (BANAT NEWS)