CEBU, Philippines — Patay ang usa ka amahan human kini gipusil samtang nagduwa og scatter sulod sa computer shop sa Block 1, Barangay Sawang Calero, siyudad sa Sugbo kagahapon sa kadlawon, Martes, Hulyo 15, 2025.
Giila ang biktima nga si Ricardo Igot, 46, ex-convict, e-bike driver ug nagpuyo sa naasoy nga dapit.
Nagkanayon si Police Lieutenant Colonel Maria Theresa Macatangay, Deputy City Director for Operation ug tigpamaba sa Cebu City Police Office nga nagduwa og scatter ang biktima sa dihang giduol og duha ka tawo ug diretso kining gipusil sa ulo hinungdan sa kamatayon niini.
Nasuta sa ilang imbestigasyon nga tighatud og illegal nga drugas ang biktima, gani nadakpan na kini niadtong February 2023 tungod sa paghupot og illegal nga drugas ug nakagawas niadto lang 2024.
"So kapin na sa tuig nga nakagawas ni siya but we surmise nga wala gyud ni siya niundang sa iyahang buhat and nakasala siguro ni sa ilahang grupo mao ni nahitabo," sigon ni Macatangay.
Ang 24-anyos nga anak nga lalake sa biktima miingon nga dunay nibahad sa iyahang amahan nga hutdon sila og patay. Ang kapolisan duna nay persons of interest sa maong kaso ug duna na sab silay kopya sa mga footages sa CCTV nga magamit sa imbestigasyon. IBM BANAT NEWS