Lalaki giunay og pusil patay sa iyang kaila

CEBU, Philippines — Patay ang us aka 42-anyos nga lalaki human kini pusila sa iyang kaila gumikan sa away sa ilegal nga drugas sa nilabay’ng adlaw diha sa Sitio Lupa 1, Barangay Pajac, Dakbayan sa Lapu-Lapu.

Ang biktima mao si Deo Labrada, ulitawo, nagpuyo sa Sitio Abuno sa maong barangay.

Nagkanayon si Police Lieutenant Colonel Christian Torres, tigpamaba sa Lapu-Lapu City Police Office nga nakadawat sila og tawag gikan sa barangay ug nagpahibawo kalabot sa patay'ng lawas nga nakit-an sa maong lugar.

Nabantayan sa kapolisan nga ang biktima giguyod kini gikan sa orihinal nga lugar nga nahitaboan.

Base sa imbestigasyon sa kapolisan nga ang biktima kuyog ang laing tulo ka lalaki nisulod sa balay sa iyang silingan mga ala 1:00 sa hapon kay giingong nag-pot session kini diha sulod sa balay.

Paglabay sa pipila ka minuto adunay nadungog nga buto sa armas.

Nilabay ang usa ka oras nakit-an si alyas “Jun” ang tag-iya sa balay ug alyas “Joy” nga nigawas gikan sa balay ug nagtinabangay sa pagguyod sa biktima.

Nakit-an ang patay'ng lawas sa biktima 20 metros ang gilay-on gikan sa balay diin nahitabo ang insidente.

Nabalhog sa prisohan sa Lapu-Lapu City Police Office sila si Jun ug Joy gumikan sa kasong obstruction of justice human ilang gilimpiyohan ang crime scene.

Ang mga suspetsado nihimakak sa pasangil batok kanila ug nipasangil sa lain nilang kauban nga maoy nihimo sa krimen human kini nagkalalis sa biktima gumikan sa sigarilyo.

Si Torres nagkanayon nga ang gunman nasuko sa biktima human kini napakyas sa pag-remit sa halin sa ilegal nga drugas. (BANAT NEWS)