Cebu Province adunay taas nga kaso sa dengue

CEBU, Philippines — Ang Department of Health nipahinumdum sa mga tunghaan niining panahon sa tingklase nga mohimo sila og clean-up drive sa eskwelahan matag usa ka buwan.

Base sa datos sa Regional Epidemiology and Surveillance Unit sa DOH-7 niabot ngadto sa 5,880 ang kaso sa dengue sa Central Visayas gikan sa buwan sa Enero hangtud sa Hunyo 14 karong tuiga diin mas taas kini og tulo ka porsyento sa nilabay nga tuig sa susamang period nga adunay 5,694 ka kaso sa dengue sa rehiyon.

Ang DOH nihingusod sa ilang kampaniya sa pagpanglimpiyo, search and destroy operation sa mga itlogan sa lamok nga nagdala sa sakit nga dengue.

Gikataho nga mas ubos ang natalang namatay karong tuiga diin 10 lang ikompara sa niaging tuig nga 20 ang natalang namatay.

Base usab sa talaan sa DOH nga sa mga highly urbanized cities ug probinsiya sa rehiyon 7 ang Cebu Province ang adunay pinakadaghang kaso nga anaa sa 2,939 ug lima ang natalang patay ug gisundan sa Lalawigan sa Bohol nga adunay 1,275 ka kaso, Cebu City nga adunay 999, Dakbayan sa Lapu-Lapu nga adunay 378 ug Dakbayan sa Mandaue nga adunay 289.

Si Dr. Ronald Jarvik Buscato, pangulo sa Communicable Diseases Section niawhag sa mga tunghaan niining panahon sa tingklase nga mopahigayon og clean-up-drive bisan ka usa matag buwan ug kausa sa matag semana mopahigayon og search and destroy aron sa pagsguro nga walay lugar sa eskwelahan nga mahimong breeding place sa mga lamok. Christyll Y. Tecson, CNU Intern/BDB BANAT NEWS