90 porsyento sa kapolisan sa CCPO anaa sa kadalanan

CEBU, Philippines — Gibutyag sa Cebu City Police Office (CCPO) nga 90 percent sa ilahang pwersa sa kapolisan ang gi-deploy sa kadalanan sa Siyudad sa Sugbo.

Kini ang gipadayag ni Police Lieutenant Colonel Maria Theresa Macatangay, deputy city director for operations ug tigpamaba sa CCPO.

Matud ni Macatangay nga bisan kadtong mga naghimo og admin duties dunay portion sa ilahang duty hours nga mogawas gyud sila ug mo-render og patrol duties.

Nasayran nga ang CCCPO adunay 1,300 ka PNP personnel.  Sa laing bahin,  nakadawat usab og duha ka Honda nga motorsiklo ang kapolisan sa CCPO gikan sa Police Regional Office-7 niadtong Lunes sa Hunyo 23, 2025.  Ubos sa pagpangulo ni Police Colonel Enrico Figueroa, acting city director ang CCPO nagpakita og talagsaong mga lakang sa pagpausbaw sa ilang mga kapabilidad sa panerbisyo ngadto sa komunidad alang sa kaayohan ug kaluwasan sa katawhan.

Matud sa CCPO nga niadtong Marso 24, 2025 nakadawat na sila og15 ka advanced Honda 150cc nga motorsiklo ug napun-an kini karon gumikan sa nakita nga kalamboan sa  kapolisan.

Ang maong mga motorsiklo gamiton alang sa pagpatrolya sa kapolisan.

Gikataho nga ang maong mga motorsiklo gamiton sa Tactical Motorcycle Riding Unit (TMRU) sa Cebu City Mobile Force Company.

Si Figueroa nagpasalamat sa maong suporta ngadto kanila.  Anthony Despi, CNU Intern/BDB BANAT NEWS