Militanteng pundok nagprotesta sa pagsaka sa presyo

CEBU, Philippines — Mga militanteng pundok sa Sugbo ang mipahigayon og lihok protesta kagahapon subay sa padayon nga pagsaka sa presyo sa produktong petrolyo. Gikondinar sa Bagong Alyansang Makabayan – Central Visayas ang pagsaka sa presyo sa lana nga resulta sa gubat sa Middle East diin nanginlabot na ang Estados Unidos. Matud pa ni Jaime Paglinawan ang chairman sa Bayan Central Visayas, nakaapekto kaayo ang gubat ilabi na sa pagsaka sa presyo sa lana nga maoy hinungdan usab sa pagmahal sa presyo sa mga nag-unang palaliton.

Nanghinaut ang grupo nga mahatagan usab og proteksyon ang mga Pilipino nga naa sa mga nasud nga nakasinate og kagubot.

Gitambongan ang kalihukan sa mga tinun-an, trabahante ug uban pa.

Subay niini gipangayo sa progresibong grupo ang pagsuspenso sa buhis sa lana aron makuhaan ang pagsaka sa presyo niini.

Si Paglinawan nipadayag og kabalaka sa mga Overseas Filipino Worker (OFW) nga anaa sa gawas sa nasud nga nanimpalad aron adunay ikapadala sa ilang pamilya dinhi sa Pilipinas. Clifford T. Bacon ug Shyrielle A. Lariosa | CNU Intern BANAT NEWS