LTO nipahimangno sa pagsiguro sa kondisyon sa sakyanan

CEBU, Philippines — Gipahimangnoan sa Land Transportation Office (LTO) ang mga motorista nga siguradohon nga anaa sa maayong kondisyon ang ilang mga sakyanan gumikan kay ipatuman sa ahensiya ang mas hugot nga kampanya batok sa mga sakyanang expired na ang rehistro, lisensiya ug delikadong gamiton diha sa kadalanan.

Si LTO Chief Assistant Secretary Vigor Mendoza nagkanayon nga ang kampaniya subay kini sa mga nangaging disgrasya sa kadalan nga naglambigit sa mga depektoso nga piyesa ug accessories sa sakyanan diin adunay mga nakalas.

Ang LTO nisubay sa datos sa United Nations diin adunay average nga 32 ka Filipino ang mamatay kada adlaw tungod sa mga aksidente sa kadalanan.

Ubos sa Philippine Road Safety Action Plan, ang administrasyong Marcos nagtinguha nga makunhoran ang mga aksidente sa kadalanan ngadto sa labing menos 35 porsiyento sa 2028.

Aron masuportahan kini, gi-finalize na sa LTO ang ilang campaign plan ug ang koordinasyon sa mga hingtungdan nga ahensiya alang sa pagpatuman sa gipakusgan nga kampaniya batok sa mga sakyanang expired ang rehistro ug kadtong dili na luwas gamiton diha sa karsada.

Ang ahensiya niluwat kini og memorandum sa guidelines sa pagpatuman sa balaod ug planong sugdan sa LTO ang agresibong operasyon sa buwan sa Agosto niining tuiga.

Ang memorandum naglatid nga ang mga sakyanang adunay expired nga rehistro i-impound hangtud marehistro kini ug makapasar sa mandatory nga roadworthiness inspection ug ang mga malapason mag-atubang og P10,000 nga multa subay sa Joint Administrative Order No. 2014-01 ug Republic Act No. 4136.

Samtang, ang mga sakyanang masakpang adunay deperensiya sama sa mga bald tire, guba nga windshield, nagbitay nga mga piyesa o grabe nga pagboga og itom nga aso, i-impound hangtud makompleto ang tanang rekisitos aron kini mahimong luwas gamiton. BDB BANAT NEWS