Proyekto para sa mga single mother giplanohan ni Osmeña

CEBU, Philippines — Giplano ni Vice Mayor-elect Tomas Osmeña ang usa ka proyekto nga nagtumong sa pagsuporta sa 40 ka single mothers pinaagi sa usa ka housing-and-employment framework nga maghatag kanila og lugar puy-anan ug kasiguruhan sa trabaho, samtang masiguro nga mabantayan gihapon nila ang ilang mga anak.

Gipadayag ni Osmeña ang plano niadtong Hunyo 19, 2025, atol sa panagtagbo sa usa ka Business Process Outsourcing (BPO) company.

Ang maong proyekto motubag sa kasagarang problema sa mga inahan nga nag-inusara og padako sa ilang mga anak lakip na ang transportasyon, childcare, ug kalisod sa pagsud sa trabaho.

Ubos sa proyekto, ang mga single mothers papuy-on sa usa ra ka lugar, magtrabaho sa parehas nga BPO office, ug ilang mga anak motungha sa parehas nga tunghaan. Aduna usab kini’y organisadong sistema sa transportasyon, diin usa ra ka shuttle bus ang mohatud ug kuha sa mga inahan ug ilang mga anak padulong sa trabaho ug eskwelahan.

“So why 40? Because that’s the size of a bus,” matud ni Osmeña, nga misaysay nga ang plano gihimo aron mahaom sa transport capacity ug mapadali ang adlaw-adlaw nga lihok sa mga inahan.

Apil sa plano ang pagtabang sa ilang panginahanglanon sama sa pagkaon, tubig, kuryente, ug pag-atiman sa ilang anak samtang sila nagtrabaho. Pinaagi niini, gilauman nga mawala ang kabalaka sa single mothers sa pagbalanse sa ilang trabaho ug responsibilidad sa pamilya.

Ang proyekto gihulagway ni Osmeña nga “form of shared living and working” diin ang mga benepisyaryo magtinabangay sa ilang mga buluhaton ug kinabuhi. Giklaro sab niya nga dili kini pugsanay ug libre sila kung gusto nilang mobalhin o moundang sa proyekto.

Sa pagkakaron, gipangita pa ni Osmeña ang tukmang BPO partner nga andam motambayayong sa pagpatuman sa maong setup.

Ang proyekto kabahin sa iyang mas halapad nga inisyatibo nga ipatuman ang serbisyo para sa mga night shift workers, ubos sa “Mayor of the Night” program. — Shiela Mae H. Agrabio (BANAT NEWS)