Pagrehistro sa iro ug iring gisugdan na sa city vet office

CEBU, Philippines — Gisugdan na ang mandatory registration sa tanang binuhi nga iro ug iring sa Cebu City kagahapon, Hunyo 23, nga nagtumong sa pagpasiugda sa responsableng pagpanag-iya sa hayop ug pagpugong sa rabies.

Ang ordinansa nga City Ordinance No. 2526 o Animal Welfare Ordinance gi-implementar sa City Veterinary Office pinangulohan ni Dr. Alice Utlang nga nibutyag nga ang pagrehistro nagkantidad og P200.

Gipahibalo ni Dr. Alice Utlang pangu sa Department of Veterinary Medicine and Fisheries nga adunay 24 ka mga empleyado sa kagamhanan ang nagparehistro sa ilang mga binuhi nga iro ug iring diha sa Plaza Sugbo nga hangtud lang sa Biyernes, Hunyo 27. Ang buot nga magparehistro sunod semana, mamahimo na nga mobisita sa ilang buhatan sa DVMF.

Gipahimangnoan ni Dr. Utlang ang tanang tag-iya og hayop nga kinahanglan pabakunahan ang ilang mga iro batok rabies ug iparehistro kini aron maprotektahan ang kahimsog sa hayop ug malikayan ang sakit.

Apil na sa bayad ang libreng bakuna, vaccination card, deworming, vitamins, check-up sa veterinary clinic, ug laygit (neuter/spay), subay sa ordinansa.

Giklaro sab ni Utlang nga wala na nagkataas ang kaso sa rabies sa siyudad tungod sa padayon nga pagbakuna sa barangay, apan sa gihapon nagbantay ang City Vet Office sa mga lugar sama sa Barangay Guadalupe, nga adunay taas nga kaso sa rabbies sa milabay'ng tuig.

Iyang gipasabot nga dili lang ang bakunador ang responsable, kundili ang tag-iya mismo ang dapat mangitag paagi aron ilang hayop mabakunahan. Pwede sila motawag sa ilang barangay o direkta sa City Veterinary Office kung dili sila makaapil sa iskedyul.

Alang sa dugang impormasyon, tawag sa Cebu City Government–Department of Veterinary Medicine and Fisheries (DVMF) sa 0933-859-5896, 401-0418, o 401-0419.

Ang pagrehistro magpadayon hangtud Septiyembre, samtang ang pagbakuna magsugod kada Enero.

Ang Cebu City maoy unang siyudad sa Pilipinas nga nagpahigayon sa CNVR (Catch-Neuter-Vaccinate-Return) program sukad Hunyo 2024, diin ang mga stray dogs kuhaon, pabakunahan, i-laygit, ug ibalik sa lugar diin nakuha human sa tulo ka adlaw aron malikayan ang euthanasia kun pagpatay ug makontrol ang populasyon sa hayop.

Base sa 2016 survey, 93 hangtod 97% sa mga iro sa kadalanan adunay tag-iya, apan gipasagdan lang. Giingon ni Utlang nga disiplina sa tag-iya ang yawe sa kalampusan batok rabies. — Shiela Mae Agrabio (BANAT NEWS)