89 ka fire hydrants sa Cebu City depektoso

CEBU, Philippines — Gipahibalo sa Cebu City Disaster Risk Reduction and Management Council nga anaa sa 285 ka fire hydrants ang wala pa mabutangi og metro samtang 65 ang nangawala ug 89 ang depektoso.

Nasayran ang estado sa mga fire hydrant sa siyudad dihang gipahigayon ang inspeksiyon sukad niadtong Abril niining tuiga.

Ang CCDRRMC nakigtambayayong sa Metropolitan Cebu Water District aron magiyahan pinaagi sa gihuptang mapa sa ahensiya aron dali nga matultol ang nahimutang sa mga fire hydrant.

Ang pangulo sa CCDRRMC Ramil Ayuman nagkanayon nga base sa datos nga gihatag kanila sa Bureau of Fire Protection (BFP), adunay 385 ka fire hydrants ang siyudad apan 25 lang niini ang adunay mga metro nga maoy dali nga magamit sa matag higayon nga moresponde og sunog.

Nasayran nga ang Barangay Guadalupe aduna kini 52 ka fire hydrants o mao ang adunay labing daghang fire hydrants sa siyudad apan 12 niini ang wala pa makit-i.

Gikataho nga adunay mga fire hydrant nga anaa nahimutang sa pribadong luna ug establisamento diin nimando si mayor-elect Nestor Archival nga ipabalhin kini aron nga magamit sa panahon sa emerhensiya.

Si Ayuman nipahimangno sa mga tag-iya sa luna nga nahimutangan sa fire hydrants nga mamahimong makiha sa kalapasan sa Akta Republika 9514 kun “Fire Code of the Philippines” kon babagan ang mga fire hydrant.

Ug ang nakahimo og kalapasan makabayad kini og multa nga P12,500 ngadto sa P50,000 matag kalapasan.

Mamahimo usab nga isyuhan og cease and desist order ang mga establisamento kong dili mosunod sa lakang sa gobiyerno sa pagpabalhin sa fire hydrants ug adunay posibilidad nga ma-revoke ang Fire Safety Inspection Certificate (FSIC) niini. (BANAT NEWS)