BPO agent natagak gikan 18th floor
CEBU, Philippines — Patay ang usa ka lalaki nga call center agent nga giingong natagak gikan sa 18th floor sa usa ka condominium sa Barangay Banilad sa Siyudad sa Mandaue alas 5 pasado sa Domingo sa buntag Hunyo 22, 2025.
Ang maong lalaki nga gipugngan pa sa kapolisan ang pangalan, 28 anyos nga ulitawo nga giingong nag-ukopar og usa ka lawak sa nahisgotang condominium unit.
Si Police Sergeant Emar Tecson, imbestigador sa Presinto 4 sa Mandaue City Police Office (MCPO) miingon nga padayon pa ang ilang imbestigasyon sa maong insidente.
Gipaabot pa nila ang mga kabanay niini alang sa hingpit nga pag-ila ug pagsuta kun naghambin ba kini og problema kay gidudahan nga posibleng naghikog kini.
Gisusi sab sa kapolisan ang mga CCTV camera sa maong condominium ug sa mga kasikbit niining establisamento sa pagsuta sa foul play sa pagkatagak sa maong lalaki.
Ang mga tenats ug mga empleyado sa maong condominium nakuratan sa nadungog nga kusog kaayong paglagapak.
Sa ilang pagsusi, nakita nila ang usa ka lalaki nga nagbuy-od ug dunay grabeng kadaut sa lawas ug wala na maglihok.
Matud pa sa kapolisan wala na kini madala sa tambalanan. — /IBM (BANAT NEWS)
- Latest
