Pag-adopt og bata gipasayon sa RA 11642

CEBU, Philippines — Bisan pa gipalig-ong bag-ong gipatuman nga RA 11642 O Domestic Administrative Adoption and Alternative Child Care Act nga naghimo sa legal nga pag-adopt nga mas paspas ug mas sayon, padayun gihapon ang online baby selling, sumala sa National Authority for Child Care (NACC) atol sa press conference niini niadtong Martes, Hunyo 17.

Sumala sa NACC, adunay 23 ka Facebook groups nga namaligya og mga masuso online kaniadtong 2024. Apan tungod sa hugot nga operasyon batok nila, upat nalang ang natala niadtong Abril ning tuiga.

Apan ning bag-o, namalik na sab ang maong modus ug na-triple kay 12 ka mga grupo na sab ang nag-operate og mga pages sa Facebook nga nagtanyag og baligyang masuso.

Matud pa kining ilang paagi dili pormal nga pamaagi sa pagsagup kay gipaagi lang sa sabot-sabot diha sa social media.

Sa mga posts sa FB, gipakita ang mga litrato ug mga detalye bahin sa masuso, kun mauyonan sa buyer, adto nila tiwason ang transaksyon sa private chat.

Duna silay middlemen nga nakapalisod sa mga otoridad pag-trace kun kinsa ang mga ginikanan sa mga masuso.

Matud ni Estrada nga ang ilegal nga pagsagop direktang hulga sa kaayohan ug kaugmaon sa bata. Pwede sab silang mabiktima sa sex, forced labor, ug pagkuha sa mga organ sa bata.

Giawhag sa NACC ang publiko, ilabina sa mga Prospective Adoptive Parents (PAPs) o gustong mosagop og bata nga ipaagi sa legal nga proseso ilang tinguha.

Ang PNP-WCPC nakahimo na og 13 ka operasyon ning tuiga ug unom ka mga masuso ang ilang naluwas samtang 14 ka mga suspek ang nadakpan.

Ang mga suspek nag-atubang ug kaso nga Expanded Anti-Trafficking in Persons Act of 2022 (RA 11862) ug Special Protection of Children Against Abuse, Exploitation, and Discrimination Act (RA 7610) nga dunay silot nga 12 hangtod 20 ka tuig nga pagkabilanggo ug multa.

Ang NACC, uban sa 16 ka Regional Alternative Child Care Offices (RACCOs) sa tibuok nasud, nakigtambayayong sa DSWD, PNP, NBI, Cybercrime Investigation and Coordinating Center (CICC) sa DICT, ug uban pang ahensya sa pagmonitor sa mga online platforms nga gigamit sa maong modus. Ang Central Visayas maoy ikatulo sa nasud nga dunay pinakadaghang bata nga gi-abandona diin 25 ka mga kaso ang natala gikan sa 2023 hangtod 2025.

Nagsunod kini sa NCR (57) ug Rehiyon IVA (29). Ang datos sa tibuok nasud nagpakita usab nga 747 ang gi-surrender, 232 ang gi-abandona, 220 ang gipasagdan.

Si Concepcion Solera, Officer-in-Charge sa RACCO-7, nikompirmar nga ang Cebu City ug Lapu-Lapu City nagpabilin nga common area sa online baby selling cases.

Niadtong Marso 2025, usa usa ka inahan sa Cebu City ang nibaligya sa bag-o pa niyang gihimugso nga masuso sa kantidad nga P30,000.

Giimbestigahan karon sa Inter-Agency Council Against Online Sexual Abuse and Exploitation of Children.Matud pa nga kadaghanan sa mga batang ipamaligya nag-edad pa og 0-5 months.

Giawhag sa NACC sa tanan nga moagi sa legal proseso sa pagsagop ubos sa bag-ong gipatuman nga RA 11642 o ang Domestic Administrative Adoption and Alternative Child Care Act of 2022.

Ubos sa maong balaod ang NACC ug RACCO lang ang modesider ug di na kinahanglang moagi sa korte nga sagad maabtan og tulo hangtud pito ka tuig una pa madesisyonan, apan sa bag-ong paagi, mogawas na ang desisyon sulod sa 60 ka adlaw.

Ang gustong mosagop, moduol lang sa ilang lokal nga RACCO ug dunay mga social workers nga mohimo og imbestigasyon kun kaya ba gyud nilang mahatagan og maayong kaugmaon ang bata.

Kun kompleto ang tanang rekisitos ang NACC na ang modesisyon kun tugotan o dili, wala kini bayad sa korte.

Aron mapadayon ang transparency, ang matag petisyon ipatik usab sa mga pamantalaan sulod sa tulo ka sunud-sunod nga mga semana. — Raphael E. Veloso ug Christyll Y. Tecson - CNU Interns/IBM (BANAT NEWS)