Memo para sa service premiums sa JO pirmado na

CEBU, Philippines — Gipirmahan na ni acting Mayor Donaldo Hontiveros ang memorandum nga nagmando sa mga financial departments sa City Hall sa pagpagawas sa service premium alang sa mga Job Order (JO) employees.

Gikompirma kini ni Hontiveros sa usa ka text message sa The Freeman/Banat News kagahapon, tulo ka adlaw human gipasaka ni Konsehal Noel Wenceslao ang isyu sa wala pa mahatag nga service premium incentives sa mga JO sa ilang sesyon sa konseho.

Sumala ni Hontiveros, gipirmahan niya ang memo niadtong Biyernes, Hunyo 20, 2025 nga nagmando sa Cebu City Budget Office, Accounting Office, City Treasurer’s Office, ug uban pang hingtungdang mga buhatan sa pagproseso ug pagpagawas niini.

Apan iyang gipasabot nga ang gi-aprubahang pagpagawas sa service premium para lang sa mga JO nga adunay appointment.

“I believe some job orders nag comply lang sa ila accomplishment reports mao naay delay,” matud pa ni Hontiveros.

Sa pangutana kun nganong nadugay ang pagpagawas, giingon ni Hontiveros nga ang service premium wala malakip sa mga exemption panahon sa election ban sa paggamit sa pundo sa gobyerno.

Mahinumduman nga nanawagan ang Cebu City Council ngadto kang Mayor Raymond Alvin Garcia, kinsa hangtod karon naka-leave pa, aron buhaton ang lakang sa pagpagawas sa dugay na nga wala na-release nga service premium ug mga sweldo sa mga JO nga sugod pa sa Oktubre sa miaging tuig.

Gisugdan kini human sa privilege speech ni Wenceslao sa ilang regular session niadtong Miyerkules, diin iyang gilatid ang kabalaka sa kahimtang sa mga JO.

Gihisgutan ni Wenceslao nga giaprobahan sa konseho ang Ordinansa Blg. 2744 niadtong Mayo 22, 2024, nga nagpatuman sa “Job Order Service Premium” alang sa mga JO personnel sa siyudad. Sa 2025, gibutangan na sab kini og pundo nga P50 milyones.

Sa Section 4 sa ordinansa, giingon nga ang tanang JO personnel mahimong makadawat og service premium nga dili molapas sa P5,000 kada buwan sa Mayo ug Nobyembre.

Gipasabot ni Wenceslao nga ang paghatag sa benepisyo mag-agad gihapon sa pahayag sa mayor nga angay gayud kini ipagawas ug depende usab sa kahimtang sa pondo sa siyudad.

Kinahanglan usab nga ang usa ka JO employee nakaserbisyo og tulo ka buwan nga may satisfactory rating nga gi-certify sa ilang department head, kutob sa Abril 30 ug Oktubre 31 sa matag tuig.

Sa samang pamahayag, giingon ni Wenceslao nga nakaduha na siya og duol ni Garcia kabahin sa isyu, ug gisugo na sab ni Garcia si City Administrator Atty. Kristine Batucan nga magpagawas og memorandum alang sa pagpagawas sa Service Incentive Premium.

Gidugang pa niya ang mas laing kabalaka kay aduna pa’y mga JO nga hangtod karon wala pa gyud kadawat og sweldo tungod kay wala pa sila matagaan og appointment. — /IBM (BANAT NEWS)