Mga land developers kinahanglang apilon sa ilang plano ang kakahuyan

CEBU, Philippines — Giduso ni Konsehal Joel Garganera ang usa ka ordinansahon nga nagmando sa mga developers sa pag-apil pagbutang og mga kakahoyan sa ilang site development plan, isip usa ka lakang batok sa nagpadayon nga deforestation sa Cebu City.

Matud pa niya, mi-report na kaniadto ang Cebu City Planning and Development Office (CPDO) kabahin sa deforestation tungod sa nagkalain-laing hinungdan. Usa na niini ang epekto sa climate change tungod sa carbon emissions ug El Niño.

Gidugang usab ni Garganera nga usa pa sab sa nakaingon niini mao ang padayung pagtukod og mga estruktura diha sa Central Cebu Protected Landscape (CCPL) nga walay pagtugot ug wala ipahibalo sa siyudad.

Ang CPDO, pinaagi nila Architect Yumi Espina ug Architect Annie Cuizon, gitataw ang katapusang submission sa Comprehensive Land Use Plan (CLUP) aron mahatagan og klarong guidelines ug restrictions sa mga dapit nga gikinahanglan og proteksyon.

“This allows us for a better enforcement mechanism on this matter though the main responsibility to enforce it should have been with the CCPL Board,” matud pa ni Garganera.

Sa maong plano, gilakip usab ang climate change adaptation nga makatabang sa pagpakunhod sa carbon emissions ug pagpanalipod batok sa dugang pagputol sa mga kahoy.

Sa konseho, gi-regulate na karon ang mga aplikasyon sa pagpamutol sa kahoy. Si Garganera, isip Chairman sa Committee on Environment, nipasikad og balaod nga maghatag og kontrol sa tree-cutting sa siyudad.

Sa nahibilin nga sesyon sa konseho, gitakda nilang hisgutan ang proposed amendment sa existing ordinance nga nagkinahanglan nga ang mga developers i-apil ang mga kahoy sa ilang development plan aron malikayan ang dakong kadaut. Ang gitun-an nga amendatory ordinance gitawag nga “An Ordinance Amending Section 7 and Section 20 of City Ordinance 2623, also known as the ‘Earth-Balling, Cutting, and Removal of Trees Ordinance of Cebu.”

Sa proposed amendment sa Section 7, kung molapas sa napulo ka kahoy ang matangtang, kinahanglan nga paningkamotan sa developer nga maapil ang existing trees sa site development plan.

Ang plano kinahanglan i-submit sa Cebu City Environment and Natural Resources Office (CCENRO).

Giusab sab ang Section 3 nga magdili sa bisan kinsa, kompanya o developer sa pagpamutol, pag-ibot o pagbalhin sa kahoy nga supak sa approved site development plan.

Gikompirmar ni Garganera nga sukad sa warning sa deforestation niadtong milabay nga tuig, gamay pa lang ang kausabang nahitabo.

“But as for the city, I think it helps na we didn’t have El Niño this year but we have a long way to go,” matud pa niya.

Gidayeg sab niya ang plano ni Mayor-elect Nestor Archival nga magtanom og 250,000 ka kahoy isip pasalamat sa kadaghan sa boto nga iyang nadawat sa bag-ohay lang nga eleksyon.

Matud ni Garganera nga andam ang CCENRO nga mosuporta sa maong inisyatiba. — /IBM (BANAT NEWS)