Archival nangita’g kompanyang mopalit og basurang plastic

CEBU, Philippines — Buot nga ipabaligya ni Cebu City mayor-elect Nestor Archival ang mga nakolektang basurang plastik ngadto sa mga pabrika nga makahimo og pag-convert niini aron nga mahimong gasoline isip solusyon aron mokunhod ang mga nagtipun-og nga mga basura sa mga landfills.

Kasamtangang nangita pa si Archival og mga pabrika nga mopalit og mga plastik nga nakolekta sa bag-uhay lang natapos nga ika-20 nga Quarterly Cebu Citywide Coastal Cleanup niadtong Sabado lakip na sab sa mga basura nga gikan sa mga kabalayan.

Ang maong konsepto namugna na kini uban sa pakig-kolaborasyon tali sa Kagamhanan sa Dakbayan sa Sugbo ug sa Japan International Corporation Agency. Sa pagkakaron duna pa silay makina nga mogisi-gisi sa mga plastic nga ibaligya ngadto sa kompanyang namaligya og semento.

Malaumon si Archival nga banhawon ang mga programa nga sama niini aron nga dili lang mokunhod ang mga basura kondili mahatagan sab og panginabuhian ang mga Sugbuanon.

Subay sa iyang malungtaron nga bisyon alang sa kalikupan, gihimug-atan ni Archival ang kamahinungdanon sa pagpahibalo sa publiko sa hustong paglabay sa basura aron nga madisiplina ang kini nga dili na magpataka og labay sa ilang mga basura. —/IBM (BANAT NEWS)