Archival mao na ang mopili og ihulip kang Dr. Mancao
CEBU, Philippines — Si Cebu City mayor-elect Nestor Archival na ang pabut-on ni mayor Raymond Alvin Garcia kun kinsa ang ihulip nga labaw sa Cebu City Medical Center karon nga niretiro na si Dr. Peter Mancao.
Si Dr. Mancao mao ang labaw sa maong ospital sulod sa duha ka tuig sukad pa niadtong 2023 ubos sa administrasyon ni kanhi mayor Michael Rama.
Kasamtangang gibutang si Dr. Anton Oliver Repusar II isip officer-in-charge kinsa mao ang kanhi assistant medical officer ni Dr. Mancao.
Matud pa ni Garcia nga bakante sab karon ang posisyon nga assistant medical officer nga kanhi gihuptan ni Repusar.
Mao nga itugyan na kini ni Garcia ngadto kang Archival kung kinsa ang angayan nga ipangtudlo niini nga mohupot sa maong mga katungdanan.
Gipasabot ni Garcia nga dili na kapaigo sa iyang administrasyon kun kinsa ang ipuli sa maong mga posisyon tungod kay ang proseso sa pagdawat og permanteng labaw sa CCMC kinahanglan nga mopaubos og mga interview, eksaminasyon ug uban pa aron nga mapamatud-an nga haum gyud kini sa ilang huptan nga posisyon. —/MEL (BANAT NEWS)
- Latest
