Mopalusot og butang sa bilangguan pasilotan

MANILA, Philippines — Kagamhanan sa Siyudad sa Mandaue nagtinguha nga masilotan ang mga tawo nga masakpan nga mopalusot og mga kontrabando lakip na ang cellphone ug electronic gadget sulod sa mga bilangguan.

Kini pinaagi sa ordinansahon nga giduso ngadto sa konseho sa siyudad diin naglatid og silot sa ipatuman nga ordinansa.

Apil sa silot mao ang pagkabilanggo sulod sa tulo ngadto sa unom ka bulan ug pagbayad og multa nga P5,000 ngadto sa buhatan sa tresurero sa dakbayan.

Si Konsehal Oscar Del Castillo nga maoy chairman sa Committee on Peace and Order sa konseho maoy nangamahan sa maong ordinansahon.

Gipasabot niya nga ilang gitinguha ang pagpalabang sa maong ordinansahon sa tuyo nga kaminusan na ang mga panghitabo sa pagpalusot og mga kontrabando o illegal nga mga butang sa jail facility.

Nasayran ang jail facility nga kanhi nahimutang sa dalan J. M. Ceniza sa Barangay Looc ang hingpit na nga gibalhin ang male dormitory sa sitio Dunggoan sa Barangay Basak sa Siyudad sa Mandaue.

Gitakda na usab sa mosunod nga mga bulan ning tuiga ang pagbalhin sa jail facility sa female dormitory ngadto na sa bag-ong gitukod nga jail facility sa sitio Dunggoan sa Barangay Basak alang sa hingpit na nga pagbakante sa daan nga bilangguan.