53-anyos nipaubos og training sa Talisay City Disaster Team

CEBU, Philippines — Wa igsapayan sa usa ka lalaki ang iyang pangidaron nga mopaubos sa pagbansay sa Talisay City Disaster Team.

Si Ricky Luza, 53 anyos nga kanhi barangay konsehal sa Maghaway miantos sa 35 ka adlaw nga training diin dunay higayon nga sila mainitan tungod kay ang tinuod nga pagluwas og tawo walay gipili nga panahon.

Nagsugod si Luza sa iyang pagka volunteer isip community first responder sa ilang barangay sa Maghaway niadtong 2022.

Tungod kay napupos naman ang iyang termino pagka konsehal nisud siya isip responding personnel sa Talisay City Disaster Risk Reduction Team.

Bisan paman sa iyang pangidaron, si Luza modasig pa sa iyang mga kauban nga mopadayon sa pagbansay ug dili panumbalingon ang uwan ug init.

Uban ni Luza sa training ang 19 anyos nga nursing student nga si Coleen Lore Ventic.

Si Ventic nagbakasyon pa ug imbis nga mopahuway o molaag gipili niya nga mopaubos sa maong training.

Usa siya sa mga niboluntaryo nga CFR sa barangay Jaclupan bisan og wala kini sweldo.

Nahimo siya nga sakop sa CFR sa 17 anyos nga pangidaron tungod kay gusto siya nga makat-on ug makatabang sa isig kaingon.

Sigon pa ni Joshua Mahinay, assistant training officer sa disaster team nga 13 ang nipaubos sa training seminar ug walo kanila ang mga personnel sa Talisay DRRMO, duha ang mga bag-o samtang lima ang niboluntaryo nga CFR gikan sa tulo ka barangay sa Talisay.

Usa na sab kini sa ilang pagpangandam sa pagtimaan sa Disaster Resilience Month ug pag andam kung adunay nagkinahanglan og tabang.

Si Luza ug si Coleen maoy magsilbing inspirasyon sa tanan nga ang pagtabang dili masukod sa pangidaron kundili sa kinasingkasing nga tabang nga walay gipaabot nga suhol.