Asawa’g anak giselosan

CEBU, Philippines — Usa ka amahan ang gipadakop sa iyang asawa human iyaha kining gikulata kay gidudahan niining aduna kini relasyon sa ilang anak. Nahitabo kini sa usa ka barangay sa  Siyudad sa Sugbo, niadtong alas-8 sa gabii sa Miyerkules, Hunyo 18, 2025.

Ang suspek nga 45-anyos, nagtrabaho sa usa ka lugawan, samtang ang iyang anak 24-anyos, ug ang asawa niining reklamante  48-anyos nga tindera sa bakery,  ang tulo parehong nagpuyo sa usa ka balay, ilang mga pangalan gitago sa Banat News aron protektahan ang dungog sa ilang pamilya).

Sa pakighinabi sa Banat News sa Gender and Development (GAD) Focal Person sa maong barangay (ngalan gipugngan) nakadawat sila og tawag pasado alas 8 sa gabii gikan sa 48-anyos nga ginang kay kini ug ang iyang anak gipangdapatan sa suspek nga hubog nga nauli sa ila.

Gikatahong nagselos ang amahan sa iyang anak human nakit-an nga nagtupad kini og tulog sa inahan, ug gipasanginlan ang duha nga dunay nahitabo nilang duha.

Tungod niini, kalit nga gikulata sa bana ang ginang maong gibadlong kini sa ilang anak, apan giapil niya kini og dapat hinungdan nga nagkarambola ang managmahan.

Base sa inisyal nga pakisusi, nakainom ang maong suspetsado nga maong hinungdan sa pagpamun-og sa iyang anak ug asawa.

Matud sa GAD focal person nga di lang kini ang unang higayon nga nanapat ang suspek sa asawa, pirme niya kining buhaton ilabi na mahubog.

Apan karon dili na siya maantos pa ang binuhatan sa iyang bana kay karon hasta na ilang anak gidapatan niini tungod sa wala sa lugar nga pangabubho.

Gisikop sa kapolisan ang suspek apan sa dihang nahuwasan natingala nganong naa siya sa prisohan.

Gipasaylo ra sa asawa ug anak ang suspek ug gihusay sa barangay. Gitagaan og Barangay Protection Order (BPO) nga sulod sa 15 ka adlaw ang mga biktima.-- Anthony Despi,CNU Intern, IBM BANAT NEWS